Bekzod Abdurahmonov Tokio Olimpiadasi bronza medalini qo‘lga kiritdi

Erkin kurashchi Bekzod Abdurahmonov Tokio Olimpiadasida bronza medalni qo‘lga kiritdi.
Abdurahmonov bronza medali uchun bahsda qozog‘istonlik Daniyar Qaysanovni 13:2 hisobida muddatidan avval mag‘lub etdi.
-74 kg vazn toifasida harakat qiladigan Abdurahmonov bronza medali uchun o‘tish bahsida Gvineya-Bissau vakili Augusto Midanani taslim etgandi.

Abdurahmonov ishtirokidagi final bahsi videosini bu yerda tomosha qilish mumkin — video.

Abdurahmonov musobaqadagi ishtirokini 1/8 finalda boshlagandi va unda Puerto-Riko vakili Franklin Gomesni 10:0 hisobida yengandi. Biroq 1/4 finalda Bekzod rossiyalik ikki karra jahon chempioni Zaur Sidakovga imkoniyatni boy berib qo‘ydi.

Sidakov final yo‘llanmasini qo‘lga kiritgani sababli Abdurahmonovda bronza medali uchun kurashish imkoniyati saqlanib qolgandi.

^{Foto: Getty Images}
Ma’lumot uchun, bu O‘zbekiston uchun Tokio Olimpiadasidagi 4-medal bo‘ldi. Bungacha Ulug‘bek Rashidov (taekvondo) va Akbar Jo‘rayev (og‘ir atletika) oltin, Davlat Bobonov (dzyudo) esa bronza medalini qo‘lga kiritgandi.

Bekzod Abdurahmonov 1990 yilning 15 martida Toshkentda tug‘ilgan. U faoliyati mobaynida 2 martadan Osiyo o‘yinlari va Osiyo chempionatida g‘olib bo‘lgan. 2018 yilgi Jahon chempionatida esa bronza medalni qo‘lga kiritgan. Shuningdek, Bekzod Rio—2016 Olimpiadasida ham ishtirok etgan. “Zamin” yangiliklarini “Vkontakti”da kuzatib boring