Elektron savdoda muvaffaqiyatga erishish siri: BirBir tajribasi

O‘tgan yilning sentabr oyida ishga tushirilgan BirBir e’lonlar platformasi qisqa vaqt ichida O‘zbekistonda elektron savdo bozorida o‘z o‘rnini topdi. Bir yil ichida platforma Android uchun eng ko‘p yuklab olingan dasturlar o‘ntaligiga kirishga muvaffaq bo‘ldi.

Startapning bosh direktori va asoschilaridan biri Andrey Tereshin o‘tgan yil natijalari, elektron savdo bozorining o‘ziga xosligi va kelgusidagi rejalar haqida fikr bildirdi. BirBir platformasi O‘zbekistonda elektron savdoni rivojlantirishga qaratilgan yangi yondashuvni taqdim etdi.

Bozor tahlili davomida kompaniya jamoasi mamlakatda e’lonlar platformalarini rivojlantirish imkoniyatlarini ko‘rib, bir qator muhim farqlarni aniqladi. O‘zbekistonda elektron savdo ko‘proq Toshkent shahrida rivojlangan bo‘lsa-da, hududlarda hali katta salohiyat mavjud.

Aynan shu omillar platformaning butun mamlakat bo‘ylab foydalanish imkoniyatini yaratish uchun asos bo‘ldi. O‘zbekiston iqtisodiyoti oxirgi yillarda ikki baravar o‘sib, 100 milliard dollardan oshdi.

Xalqaro investorlar mamlakatni istiqbolli bozor sifatida ko‘rib, mahalliy platformalarni qo‘llab-quvvatlashga tayyor. BirBir jamoasi aynan shu davrda bozorga kirib, ichki va xalqaro darajada kengaytirish mumkin bo‘lgan platforma yaratishga kirishdi.

Platformaning asosiy maqsadi – har xil ehtiyojlar uchun bitta universal platformani taklif etish. Platforma foydalanuvchilarning odatlarini shakllantirish uchun kundalik foydalaniladigan mahsulotlar – kiyim-kechak, maishiy texnika va uy aksessuarlari bozoridan ish boshladi.

Keyinchalik avtomobillar, ko‘chmas mulk va xizmatlar kabi yuqori daromad keltiruvchi segmentlarga e’tibor qaratildi. Jamoa uchun dastlabki qiyinchiliklardan biri malakali xodimlarni shakllantirish bo‘ldi.

Loyiha doirasida mahalliy mutaxassislar va xorijlik ekspertlar o‘rtasida muvozanatni saqlashga e’tibor qaratildi. Bundan tashqari, platforma analitikani avtomatlashtirish va ma’lumotlarga asoslangan qarorlar qabul qilish jarayonini yo‘lga qo‘yishga intildi.

Bir yil davomida platforma faol foydalanuvchilar soni (MAU), kunlik foydalanuvchilar soni (DAU) va mijozlarni ushlab qolish darajasi (CRR) kabi mahsulot ko‘rsatkichlarini sezilarli darajada oshirdi. Shu bilan birga, foydalanuvchilarning o‘zaro ishonchini oshirish va mavjud savdo uslublarini raqamli muhitga moslashtirishga alohida ahamiyat berildi.

BirBir platformasi foydalanuvchilarga xavfsiz bitimlar, tovarlarni yetkazib berish va sotuvchilarni tekshirish kabi xizmatlarni taklif etadi. Ayniqsa, xavfsiz bitimlar tizimi sotuvchi va xaridor o‘rtasidagi ishonchni oshirishga yordam beradi.

Platformaning asosiy maqsadi – foydalanuvchilarning kunlik hayotining bir qismiga aylanishdir. O‘zbekistonda e’lonlar platformasi bozori hali yangi bosqichda bo‘lib, foydalanuvchilar odatlarini shakllantirishga katta e’tibor qaratilmoqda.

Platforma ikkilamchi bozorni rivojlantirishda davom etib, foydalanuvchilarning turmush tarziga mos keladigan qulay va xavfsiz vositalarni taklif etadi. “Zamin”ni Telegramʻda oʻqing!