Dunyo bo‘ylab 149 million foydalanuvchining parollari internetga sizib chiqdi
Katta ko‘lamli sizib chiqish oqibatida 149 million foydalanuvchining login va parollari, bank kartalari rekvizitlari hamda davlat tizimlariga kirish xizmat kalitlari internetga tarqaldi. Zarar ko‘rganlar orasida Google’ning Gmail servisiga tegishli 48 million akkaunt, Facebook’ning 17 million akkaunti va Binance kriptobirjasining 420 ming hisob qaydi bor. Shuningdek, striming platformalariga kirish kalitlari ham internetdan topilgan.
Katta ko‘lamli ma’lumotlar sizib chiqishi oqibatida turli onlayn servislarning 149 million foydalanuvchisiga oid ma’lumotlar ochiq internetga tarqaldi. Sizib chiqqan bazada login va parollar, bank kartalari rekvizitlari, shuningdek davlat tizimlariga kirish uchun mo‘ljallangan xizmat kalitlari ham bor. Bu haqda podrobno.uz xabar beradi.
Wired texnologik nashri xabariga ko‘ra, zarar ko‘rganlar orasida Google’ning Gmail pochta servisiga tegishli 48 million akkaunt, Facebook ijtimoiy tarmog‘ining 17 million akkaunti hamda Binance kriptobirjasining 420 ming hisob qaydi bor. Bundan tashqari, striming platformalariga kirish kalitlari ham internetdan topilgani aytilmoqda.
Hozircha sizib chiqish manbai va ushbu ma’lumotlar kimga tegishli ekani aniqlanmagan. Dastlabki baholashlarga ko‘ra, bunday katta hajmdagi ma’lumotlarni yig‘ish uchun kiberjinoyatchilar zararli dasturlardan foydalangan bo‘lishi mumkin.
Avvalroq O‘zbekistonda transport oqimini “aqlli” boshqarish uchun o‘rnatilgan qariyb yuzta yo‘l kamerasi tarmog‘i uzoq vaqt parolsiz ochiq turgani haqida ham xabar berilgan edi. Ta’kidlanishicha, bu zaiflik istalgan foydalanuvchiga real vaqt rejimida millionlab odamlarning harakatini kuzatish, yo‘lovchilarning yuzlarini ko‘rish va yuqori aniqlikdagi videoarxivlarga kirish imkonini bergan. Keyinchalik rasmiylar ushbu ma’lumotni rad etgan.
Izohlar 0
…