2026 yilda Apple, Samsung va boshqa yirik elektronika ishlab chiqaruvchilari yangi qurilmalarini bozorga olib chiqishni rejalashtirmoqda. Ular orasida arzonroq noutbuklar, sog‘liqni nazorat qilishga yo‘naltirilgan taqiladigan gadjetlar hamda ichki sun’iy intellekt imkoniyatlari kuchaytirilgan yechimlar bor. Bu haqda kursiv.uz xabar beradi.
Insayderlar ma’lumotiga ko‘ra, Apple ilk bor nisbatan byudjet segmentiga kirishi mumkin: kompaniya taxminan 600 dollar atrofida baholanayotgan noutbuk modelini sinovdan o‘tkazmoqda. Narxni pasaytirish hozirgi MacBook’larda ishlatiladigan M-seriyali protsessorlar o‘rniga A18 Pro mobil chipidan foydalanish hisobiga ta’minlanishi kutilmoqda. Yangi qurilma o‘qish, hujjatlar bilan ishlash va kundalik vazifalar uchun mo‘ljallanadi.
Shuningdek, yil oxiriga yaqin Apple kamerali, mikrofonli va Siri orqali ovozli boshqaruvni qo‘llab-quvvatlaydigan ilk aqlli ko‘zoynaklarini ham namoyish etishi ehtimoli bor.
Samsung va Google esa 2026 yilda e’tiborni sog‘liq ko‘rsatkichlarini kuzatishga xizmat qiladigan taqiladigan elektronikani rivojlantirishga qaratadi. Kutilishicha, Galaxy Watch’ga yurak yetishmovchiligi xavfini erta aniqlashga yordam beradigan funksiyalar qo‘shiladi, Pixel Watch esa qon bosimi ko‘tarilishi ehtimolini oldindan baholash vositalariga ega bo‘ladi.
Bundan tashqari, Samsung yangilangan dizayn va uzoqroq avtonom ishlash vaqti bilan Galaxy Ring aqlli uzugining ikkinchi avlodini tayyorlamoqda.
Taqiladigan qurilmalar bozoriga «Yandex» ham kirishni rejalashtirgan: kompaniya AI-assistent integratsiyalangan «aqlli» quloqchinlar ustida ishlamoqda. Ular smartfonsiz turib ham bron qilishdan tortib xaridlargacha bo‘lgan kundalik amallarni bajarishga imkon berishi aytilmoqda.
“Zamin”ni Telegramʻda oʻqing!
