Angliya Premer-ligasining 21-turida «Manchester Siti» o‘z muxlislari oldida «Brayton»ni qabul qiladi. Qog‘ozda raqib o‘rtamiyona jamoalardan biri bo‘lib ko‘rinsa-da, bu bahsda “oson o‘yin” degan gap yo‘q: ochko yo‘qotsang — chempionlik poygasidagi masofa darrov uzayadi.
Yangi yil «shaharliklar» uchun ancha og‘ir start oldi. 2026 yilning dastlabki ikki uchrashuvida «Sanderlend» va «Chelsi»ga qarshi duranglar qayd etilib, jamoa qimmatli ochkolardan quruq qoldi. Endi esa Gvardiola shogirdlari «Brayton»ga qarshi maydonga faqat bitta maqsad bilan chiqadi: g‘alaba.
Kadrlar tanqisligi va Husanovga katta ishonch
Eng katta tashvish — himoya markazida. «Chelsi»ga qarshi bahsda yetakchi markaziy himoyachilar Yoshko Gvardiol va Ruben Diash og‘ir jarohat olgani sabab, Gvardiola «Brayton»ga qarshi o‘yinda Abduqodir Husanov hamda Natan Akening ilk daqiqalardan maydonga tushishiga ishonadi. O‘zbekistonlik ishqibozlar uchun esa bu uchrashuvning alohida “ta’mi” ham shu yerda: Husanov katta sahnada yana bir bor o‘zini ko‘rsatish imkoniyatini olyapti.
Holand uchun “yo seriya to‘xtaydi, yo tarix yoziladi”
Bu bahsda diqqat markazidagi yana bir nom — Erling Xoland. Norvegiyalik to‘purarning oliy divizionda shunday “qattiq” statistikasi bor: u hali biror marta ketma-ket to‘rtta o‘yinda gol urmasdan qolmagan. Hozirgi golsiz seriya esa uchta o‘yin. Demak, «Brayton»ga qarshi bahsda yo noxush zanjir uziladi, yo Xoland o‘z faoliyatida yangi antirekordga duch keladi. Qisqasi, muxlislar uchun intriga tayyor.
Qiziqarli faktlar: bu o‘yinda raqamlar ham gapiradi
- «Manchester Siti» ligada o‘z uyida «Brayton»ga hech qachon yutqazmagan: 12 g‘alaba, 3 durang. Bu klub tarixida muayyan raqibga qarshi uydagi eng uzoq mag‘lubiyatsiz seriyalardan biri.
- Fil Foden — ushbu to‘qnashuvlar tarixidagi eng sermahsul to‘purar. U «Brayton»ga qarshi o‘zaro bahslarda jami 11 bor gol urgan.
- «Siti» Premer-ligada so‘nggi ikki o‘yinni durang bilan tugatdi. Pep Gvardiola murabbiylik faoliyatida ligada ketma-ket uch durang faqat ikki marta kuzatilgan: 2017 yil apreli va 2023 yil dekabrida.
- 2025 yil avgustida «Brayton» 2:1 hisobida g‘alaba qozongan o‘yinda «Siti»ning sobiq vakili Jeyms Milner penaltidan gol urib, APLda 11 metrlikdan gol urgan eng katta yoshli futbolchiga aylangan: 39 yoshu 239 kun.
- «Manchester Siti» Premer-ligada «Brayton»ga qarshi o‘tkazgan barcha 17 o‘yinda gol urgan. Bu raqibga qarshi 100 foizlik golli seriya (shunga o‘xshash natija «Bornmut»ga qarshi ham bor).
- «Siti» chorshanba kunlari o‘tkazilgan APLning so‘nggi 33 o‘yinidan 31 tasida g‘alaba qozongan (1 durang, 1 mag‘lubiyat). Uyda esa chorshanba kuni o‘tkazilgan so‘nggi 22 o‘yinning barchasida yutgan — liga tarixida muayyan hafta kunida uydagi juda uzoq seriya.
Qachon va soat nechada?
«Manchester Siti» — «Brayton» uchrashuvi 7 yanvardan 8 yanvarga o‘tar kechasi, Toshkent vaqti bilan soat 00:30 da start oladi.
Xulosa qisqa: bu kecha oddiy o‘yin emas. Bir tomonda — ochko yo‘qotishga haqi qolmagan «Siti», ikkinchi tomonda — favoritlarga “qaqshatqich” bo‘lishni yaxshi ko‘radigan «Brayton». Va albatta, biz uchun yana bir alohida liniya bor: Abduqodir Husanovning katta imtihoni.
