Germaniyaning "Audi" kompaniyasi Pekin avtosalonida maxsus Xitoy bozori uchun mo'ljallangan A6L e-tron elektr sedanini namoyish etdi. "Audi FAW" qo'shma korxonasi tomonidan ishlab chiqariladigan ushbu model mashhur A6L seriyasining to'liq elektrlashtirilgan davomchisi hisoblanadi. Bu haqda Ixbt.com xabar beradi.
Yangi elektromobilning asosiy o'ziga xosligi uning g'ildirak bazasi oddiy modelga nisbatan 132 mm ga uzaytirilganidir. Bu o'zgarish orqa o'rindiqdagi yo'lovchilar uchun qo'shimcha qulaylik yaratadi.
Kuzov dizaynida uzunroq orqa eshiklar va o'zgartirilgan tom chizig'i ko'zga tashlanadi, aerodinamik qarshilik koeffitsienti esa 0,22 ni tashkil etadi.
Texnik jihatdan eng kuchli versiya 543 ot kuchi va 779 Nm aylanish momentiga ega ikkita elektr dvigatel bilan jihozlangan. Avtomobil 100 km/soat tezlikka 4,3 soniyada erishadi.
107 kVt/soat sig'imli akkumulyator CLTC sikli bo'yicha bir quvvatlanishda 815 km masofani bosib o'tish imkonini beradi.
Elektromobil 800 voltli platformada qurilgan bo'lib, tezkor quvvatlanish tizimini qo'llab-quvvatlaydi. Bu orqali energiya zaxirasini 21 daqiqa ichida 10 foizdan 80 foizgacha to'ldirish mumkin.
Salonda 11,9 dyuymli raqamli panel, 14,5 dyuymli multimedia ekrani va old yo'lovchi uchun alohida displey o'rnatilgan.
Xitoy bozorida yangi modelning narxi 310 mingdan 440 ming yuangacha (taxminan 3,4–4,85 mln rubl) etib belgilangan. Avtomobil shuningdek raqamli yon ko'zgular, massaj funksiyali o'rindiqlar va "Bang & Olufsen" akustika tizimi bilan jihozlangan.
“Zamin”ni Telegramʻda oʻqing!
