"Manchester Yunayted" hujumchisi Benyamin Sesko Angliya premyer ligasidagi debyut mavsumidan so'ng o'z rejalari bilan o'rtoqlashdi. Sloveniyalik futbolchi "Old Trafford"da sovrinlar yutishni va jamoaning muvaffaqiyatlariga hissa qo'shishni niyat qilgan. Bu haqda Goal.com xabar beradi.
Sesko o'tgan yozda "RB Leypsig" klubidan transfer qilingan edi. U jamoaning hozirgi holati va vaqtinchalik murabbiy Maykl Karrik boshqaruvidagi o'zgarishlarni yuqori baholadi.
Futbolchining fikricha, klub to'g'ri yo'nalishda rivojlanmoqda.
«Biz ajoyib natijalar ko'rsatmoqdamiz. Jamoada kuchli ruh shakllangan.
Men bu yerda sovrinlar yutishni juda xohlayman. Buning uchun ko'p mehnat qilishimiz kerak, ammo bizda bunga yetarli salohiyat bor», — dedi Sesko.
Karrik yanvar oyida jamoani qabul qilib olganidan beri klubdagi muhit sezilarli darajada o'zgardi. "Manchester Yunayted" so'nggi 12 ta o'yinning 8 tasida g'alaba qozonib, Chempionlar ligasi yo'llanmasi uchun kurashga qaytdi.
22 yoshli hujumchi joriy mavsumda barcha musobaqalarda 10 ta gol urishga muvaffaq bo'ldi. U tajribali futbolchilar va murabbiylar shtabidan ko'p narsani o'rganayotganini hamda Manchesterdagi hayot unga ma'qul kelayotganini ta'kidladi.
Dushanba kuni jamoa "Brentford"ga qarshi maydonga tushadi. Tarkibda ayrim muammolar mavjud: Lisandro Martines diskvalifikatsiya sababli o'yinni o'tkazib yuboradi.
Leny Yoroning holati esa tibbiy ko'rikdan so'ng aniq bo'ladi. Garri Maguayr esa safga qaytgan.
“Zamin”ni Telegramʻda oʻqing!
