85
Самарқандда иқлим масалаларига бағишланган Марказий Осиёдаги илк тарихий форум бўлиб ўтди, деб Nova24.uz сайти хабар берди. Ушбу форум якунида Ўзбекистон бир қатор муҳим ҳамкорлик ҳужжатларини имзолади.
Жумладан, Ўзбекистон Немис Халқаро Ҳамкорлик Жамияти (GIZ) билан атроф-муҳитни муҳофаза қилиш, иқлим ўзгаришига қарши кураш ва табиий ресурслардан барқарор фойдаланиш соҳасида англашув меморандумини имзолади. Бу ҳужжат мамлакатда барқарор, иқлимга чидамли ва кам углеродли ривожланишни амалга оширишга ёрдам беради.
Шунингдек, Ўзбекистон Экология вазирлиги ва Қирғизистон Табиий ресурслар вазирлиги Марказий Осиёдаги Иқлим ўзгариши ва атроф-муҳитни ўрганиш университетида мутахассислар тайёрлаш учун квоталар ажратиш бўйича келишиб олди. Қирғизистонлик талабалар учун 9 та квота (5 та — бакалавриат, 4 та — магистратура) ажратилади.
Бундан ташқари, ЮНИСЕФ билан стратегик ҳамкорлик бўйича келишув имзоланди. Ушбу келишув атроф-муҳитни муҳофаза қилиш, иқлим ўзгаришига мослашиш, табиий офатлар хавфини камайтириш, болалар учун хизматларни инклюзив ва барқарор қилишга қаратилган. Шунингдек, болаларнинг экологик муаммолар ечимларида фаол иштирокини таъминлашга алоҳида эътибор қаратилади.
Форумда БМТнинг уч нафар Бош котиби ўринбосари, 30 дан ортиқ давлат ва ташкилотлар вакиллари (UNCCD, FAO, UNIDO, UNECE, ICBA ва бошқалар), экологик конвенциялар раҳбарлари ва экспертлар иштирок этди. Форумда “Ёшил ривожланиш” концепцияси тақдим этилди ва уни Бразилияда бўлиб ўтадиган COP30 доирасида тасдиқлаш бўйича келишувга эришилди.
06:20, 12-04-2025
