Суперлиганинг 26-туридан ўрин олган ОКМК – “Насаф” (1:1) баҳсидан кейин бўлиб ўтган матбуот анжуманида қаршиликлар бош мураббийи Рўзиқул Бердиев журналистлар саволларига жавоб берди. У учрашувдаги ўйин, майдон ҳолати, чемпионлик учун кураш ва жамоанинг ОЧЛдаги иштироки ҳақида очиқ фикр билдирди.
Бердиев фикрича, бугунги ўйин техник жиҳатдан бой бўлиши мумкин эди, аммо майдоннинг аҳволи ва шароити сабабли жамоалар кўпроқ кучли кураш ва узун паслар билан ҳаракат қилишга мажбур бўлган.
“ОКМК ҳам, биз ҳам комбинацион футбол ўйнайдиган жамоалармиз. Аммо бугун майдон шундай ҳолатда эдики, тўп ерда эмас, ҳавода кўпроқ бўлди. Шунинг учун ўйин курашга айланди. Шундай бўлса-да, ҳар икки жамоада ҳам ғалаба учун имкониятлар бўлди. Агар иккинчи бўлимда имкониятлардан яхшироқ фойдаланганимизда, натижа бошқача бўлиши мумкин эди”, — деди мураббий.
Унинг таъкидлашича, “Насаф”нинг тактик қарорлари айни шароитда ўзини тўлиқ оқлаган. “Иккинчи бўлимда Голбанни ҳужумга туширдик, чунки узун пасларда курашиш учун у жуда қўл келади. Бу қароримиз самара берди. Биз кеча ОКМК майдонида машғулот ўтказмадик — футболчиларимизни техник жиҳатдан тайёрладик, аммо шароит бошқа йўл танлашга мажбур қилди”, — деди Бердиев.
Матбуот анжуманининг энг қизиқ қисми мураббийнинг чемпионлик кураши ҳақидаги сўзлари бўлди. “Ҳозир кўпчилик “Нефтчи” чемпион бўлади, деб гапиряпти. Буни эшитяпмиз, лекин мавсум охирида ҳақиқий чемпион ким эканини вақт кўрсатади. Биз ҳам шунчаки қараб турмаймиз. Кўп вақтдан бери мағлубиятсиз сериядамиз ва чемпионликка лойиқ ўйнаяпмиз. Агар “Нефтчи” чемпион бўлса, қаҳрамонларни майдондан эмас, майдондан ташқаридан қидиринглар. Бу менинг шахсий фикрим”, — деди Бердиев.
ОЧЛдаги натижалар ҳақида сўралганда, мураббий жамоа икки фронтда курашишни ўрганаётганини қайд этди. “Иккита йўналишда бир вақтда ўйнаш осон эмас. Бу биз учун мактаб. Европадаги жамоалар шундай даражада ўйнай олади, чунки уларда икки баробар кучли таркиб бор. Бизда ҳозирча бу йўқ, аммо тажриба орттиряпмиз. Масалан, “Ал-Аҳли” билан ўйинда баъзи йигитларга дам беришга тўғри келди, акс ҳолда бугун 20 дақиқа ҳам ўйнай олмасдик”, — деди у.
Бердиев шунингдек, “Насаф”нинг трансфер сиёсати ҳақида ҳам тўхталиб ўтди. Унинг фикрича, клуб халқаро даражада рақобатбардош бўлиш учун таркибни чуқурлаштириши ва юқори бюджетли ўйинчиларни жалб қилиши керак. “Агар катта мусобақаларда муносиб иштирок этмоқчи бўлсак, ҳар позицияда кучли футболчи бўлиши шарт. Бунинг учун маблағ ва тўғри стратегия талаб этилади”, — деди мураббий.
“Zamin”ни Telegram'да ўқинг!
