Россия Украина билан уруш туфайли иккита мегалойиҳадан воз кечди

^{Фото: Picture Alliance}
Украина билан уруш фонида Россия ҳукуматнинг молиявий ресурслари етишмаслиги сабабли бирданига иккита мегалойиҳадан воз кечишга мажбур, деди Узоқ Шарқ ва Арктикани ривожлантириш вазири Алексей Чекунков РБКга сешанба, 21 июнь куни берган интервьюсида.

Гап Сахалин оролига кўприк ҳамда Якутск ва Магадан ўртасидаги темирйўл қурилиши ҳақида бормоқда, лойиҳаларнинг умумий қиймати 2,3 триллион рублга баҳоланган. Иккала лойиҳа ҳам асосий инфратузилмани модернизация қилиш ва кенгайтириш бўйича комплекс режага киритилмаган, чунки улар ҳукумат томонидан «устувор эмас» деб ҳисобланди, дея тушунтирди Чекунков.

Бунинг ўрнига Россия расмийлари асосий эътиборни «шимолий денгиз логистикаси», биринчи навбатда, Шимолий денгиз йўлидаги лойиҳалар, Россия ва Хитой ўртасида қўшимча чегара ўтиш пунктларини барпо этиш, шунингдек, омборхоналарда сақлаш ҳажмини оширишга қаратмоқчи.

Алексей Чекунковнинг сўзларига кўра, концессия принципи (хусусий капитал иштирокида) Якутск ва Магадан ўртасидаги темирйўлни сақлаб қолиши мумкин. Бироқ унинг таъкидлашича, ҳозирги шароитда давлат бюджетдан молиялаштиришни таъминлай олмайди. Ёқутистон маъмурияти йўл нархини 830 миллиард - 1,7 триллион рублга баҳоламоқда, бу пулни ажратиш эса, вазир сўзларига кўра, ҳозирги шароитда «реал эмас». Шунга қарамай, минтақа мутасаддилари лойиҳани амалга оширишни талаб қилиб, бу йил ёзда режалаштириш ишларини олиб бориш ниятида.

Россия ҳукумати Сахалинга кўприк қуриш тақдирини «юк базаси», яъни лойиҳага потенциал юклама билан боғлаяпти, бунда лойиҳа иқтисодий асоссиз ноўрин бўлиб чиқади. Лойиҳанинг қиймати аввалроқ кириш инфратузилмасини ҳисобга олган ҳолда 600 миллиард рублга баҳоланганди. Сахалин области губернатори лойиҳа амалга оширилишига ишонтирган, аммо Россия президентининг атроф-муҳитни муҳофаза қилиш, экология ва транспорт бўйича махсус вакили Сергей Иванов 2020 йилда лойиҳани «ўта қиммат» деб атаган.

Ивановнинг сўзларига кўра, кўприк иқтисодиёт нуқтайи назаридан эмас, балки кўпроқ психология нуқтайи назаридан муҳим - алоқани кўрсатиш учун. Шу билан бирга, Сахалин области губернатори Валерий Лимаренко РБК’га берган интервьюсида Сахалинга кўприк «иқтисодий жиҳатдан ўзини кўрсатиши кераклиги»ни таъкидлади, чунки унинг қурилиши Японияни Сахалинга ўзи томонидан кўприк қуришга ундаши мумкин, бу эса товарлар оқими ортишига олиб келади. “Замин” янгиликларини “Facebook”да кузатиб боринг