CNN телеканали Decision Desk портали маълумотларига таянилиб, 34 ёшли Зохран Мамданининг Нью-Йорк мэри сайловларида ғалаба қозонишини тахмин қилмоқда. У шаҳар бошқарувини қўлга киритган биринчи мусулмон бўлади.
Баъзи маълумотларга кўра, Мамдани 50,3% овоз тўплаган, бошқа манбаларга кўра эса 42,75% овоз олган. CNNнинг қайд этишича, Мамданининг ғалабаси Демократик партиянинг прогрессив қаноти учун муваффақият рамзи бўлиб, айни пайтда миллий демократлар Дональд Трампга қарши қандай курашиш кераклиги борасида ягона фикрга эга эмаслар.
Ўз тарафдорлари билан учрашувда Мамдани Нью-Йоркни ёрқин келажак сари етаклашни ва барча шаҳар аҳолиси учун мэр бўлишни ваъда қилди. Бироқ, АҚШ президенти Дональд Трамп янги мэрни коммунист деб атап, унинг сайланиши шаҳар ҳолатини ёмонлаштириши мумкинлигини таъкидлади.
"Мен қатъий ишонаманки, агар Мамдани ғалаба қозонса, Нью-Йорк иқтисодий ва ижтимоий фалокат ёқасига етади", деди Трамп Social Truth саҳифасида. Мамдани Угандада туғилган, Кейптаун (Жанубий Африка) шаҳрида улғайган.
У етти ёшида Нью-Йоркка кўчиб келган. Бронкс Фанлар Олий Мактабида таҳсил олиб, Bowdoin коллежида гуманитар фанлар бўйича бакалавр даражасини олган.
2017 йилдан буён Мамдани "Американинг Демократик Социалистлари" ташкилоти аъзоси. У бойлар учун солиқларни ошириш ва минимал иш ҳақини 2030 йилга бориб, соатига 16,5 доллардан 30 долларга кўтаришни таклиф қилмоқда.
Унинг бошқа ташаббуслари орасида мактабгача таълимни ва автобусларда қатновни бепул қилиш ҳам бор. Мамданининг дастурини амалга ошириш учун керакли харажатлар корпорациялар ва миллионерлар учун янги солиқлар ҳисобига қопланади.
Бу солиқлар шаҳар бюджетига йилига 9 миллиард доллар келтириши кутилмоқда.
