Украина армияси Донбассдаги разведка операцияларида робот итлардан фойдаланишни бошлади

^{Фото: Topwar}
Украина армияси Донбассдаги айғоқчилик операцияларида робот-итлардан фойдаланишни бошлади. Бу ҳақда Topwar хабар берди.

Манбада айтилишича, разведка учун дронлардан фойдаланиш хавфли тус ола бошлаган. Рус бўлинмалари дронларни тутиб олиш тизимлари билан таъминланган, бу эса учар қурилмалар воситасидаги разведка операцияларини йўққа чиқарган.

Эндиликда Киев кучлари шарқдаги армия ихтиёрига Буюк Британияда ишлаб чиқарилган робот итларни топширган. Бу қурилмалар Германияда ишлаб чиқарилган антитермал тасвирли камуфляж билан жиҳозланган бўлиб, душман эътиборига тушмай ҳаракатлана олади.

Роботлар Британиянинг Брит Alliance компанияси томонидан ишлаб чиқилган. BAD.2 деб номланган механик ит дронлар учун имконсиз бўлган бир қатор мураккаб ер операцияларида қатнаша олади.

Робот ит бинолар ва ҳарбий окопларга кира олади, ҳарбий кучлар йўлида жойлаштирилган тузоқлар ва бомбаларни аниқлай олади. У ,шунингдек, душман позицияларининг юқори аниқликдаги тасвирини ҳам узата олади.

Мутахассислар маълум қилишича, робот ит бир қувватланишда беш соатгача ишлай олади. Қурилма ,шунингдек, 3,5 километр радиусдаги вазифаларни бажаришга қодир.Қурилманинг ердаги максимал тезлиги 15 километр соатга етиши мумкин.

Brit Alliance раҳбари Кайл Торберннинг айтишича, юқорида тилга олинган робот-итлар “жонли” разведкачилар орасидаги йўқотишларни сезиларли даражада камайтирган, чунки улар фронтда одамлар ўрнини босувчи тегишли вазифаларни самарали бажара олган.

Бундай турдаги битта разведка қурилмасининг нархи конфигурацияга қараб 4 дан 8 минг еврогача бўлиши айтилган. Ҳозирда Украина кучлари қўл остида робот итлардан 30 таси мавжуд экани хабар қилинган. “Замин” янгиликларини “Telegram”да кузатиб боринг