Инсон ҳаётида янги саҳифа очилди — 1X Technologies компанияси томонидан ишлаб чиқилган дунёдаги илк тўлиқ функционал одамсимон робот NEO расман сотувга чиқарилди. Янги авлоддаги ушбу робот оддий маиший вазифаларни бажара олади: нарсаларни кўчириш, эшикларни очиш, уй тозалаш, буюмларни жойига қўйиш ва энг муҳими — овоз орқали мулоқот қилиш қобилиятига эга.
NEO сунъий интеллект тизими билан жиҳозланган бўлиб, у фойдаланувчи билан табиий суҳбат олиб бориш, унинг одатларини эслаб қолиш ва кейинги ҳаракатларини мослаштириш имконига эга. Роботдаги компьютер кўриш тизими, аудио таҳлил функцияси ва замонавий тил модели уни ҳақиқий уй ёрдамчисига айлантиради.
Унинг техник тавсифлари ҳам диққатга сазовор: бўйи — 1,68 метр, оғирлиги тахминан 30 килограмм, 25 килограммча юкни кўтара олади. Роботнинг танаси енгил, хавфсиз ва энергия тежамкор материаллардан ишланган. Шунингдек, NEO кўплаб камералар, сенсорлар ва карнайлар билан жиҳозланган бўлиб, ҳаракатни аниқ англайди ва инсон билан фаол мулоқот қила олади.
Компания маълумотларига кўра, NEO нархи тахминан 20 000 АҚШ долларини ташкил қилади. Шу билан бирга, ойлик 499 долларлик обуна орқали ҳам роботдан фойдаланиш имкони тақдим этилади. Илк партия 2026 йилда АҚШ бозорига чиқарилади, кейин эса Европада ва Осиё давлатларида сотувга қўйилиши режалаштирилган.
1X Technologies (илгари Halodi Robotics номи билан машҳур бўлган) ушбу роботни “келажакка қадам” сифатида баҳоламоқда. Компания вакилларига кўра, яқин келажакда шундай одамсимон роботлар инсон турмушининг ажралмас қисмига айланиб, уй тозалашдан тортиб, кундалик мулоқот ва ёрдам вазифаларигача бажариши мумкин бўлади.
Таҳлилчилар фикрича, NEO нафақат робототехника соҳасида, балки умуман инсон ва машина ўртасидаги янги муносабат босқичини бошлаб бериши мумкин. Инсон ҳаётини енгиллаштиришга қаратилган бу каби роботлар кейинги йилларда ҳар бир хонадонда пайдо бўлиши эҳтимолдан холи эмас.
“Zamin”ни Telegram'да ўқинг!
