Класико "Сантьяго Бернабеу"да катта шов-шув билан якунланди. "Реал Мадрид" 2:1 ҳисобида ғалаба қозонди. Лекин ўйиндан кўра кўпроқ эътибор Ламин Ямалга қаратилди. Испаниянинг энг ёш ва шовқинли футболчиси ушбу ўйинда кутилганидан пастроқ даражада ҳаракат қилди.
"Реал"нинг ҳимояси Ламинни буткул ўйиндан чиқариб ташлади: на дриблинг, на аниқ зарбалар, на самарали ҳаракатлар – ҳамма статистикаси нолга тенг эди. "Эл-Класико"дан олдин Ламиннинг ижтимоий тармоқлардаги фаоллиги эътиборни тортди.
У "Реал"ни айбловчи баёнотлар, эски голларни эслатган видеолар ва бошқа провокацион чиқишлар билан ўзини кўрсатди. Лекин майдонга чиққанида, бу шов-шув унга қарши ишлади.
Дани Карвахал ўйин охирида Ламинни "гапни камроқ қил" деган имо-ишора билан танқид қилди. Винисиус Жуниор эса шунчаки "Жуда кўп гапиряпсан" деди.
Бу ўйин Ламин учун сабоқ бўлиши керак. Ёш истеъдоднинг юқори даражага эришиши учун фақат майдондаги ўйини эмас, балки унинг ташқарисидаги хатти-ҳаракатлари ҳам муҳим.
Испаниядаги кўплаб мутахассислар ва мухлислар Ламиннинг шахсий бренди футболчиликдан устун келаётганини танқид қилишмоқда. Бу ёшда 114 та ўйин, 28 та гол ва 39 та ассист билан юлдуз бўлиш осон, лекин бу устунликни сақлаб қолиш янада қийин.
Ҳозир Ламин учун танлов қилиш вақти келди: у кейинги ўн йилликнинг юлдузи бўлишни хоҳлайдими ёки бир ҳафталик мем бўлиб қолишни танлайдими? Муваффақият йўлида шовқин эмас, балки ўйин натижалари муҳим эканини тушуниш лозим.
Мадриддаги ўйин элит футболчилар шов-шувга эмас, фақат ҳақиқий маҳоратга эътибор беришини яна бир бор исботлади.
