95
Хитой атом электр станциялари (АЭС) қуввати бўйича дунёда биринчи ўринга чиқиб олди. Бу ҳақда Хитой атом энергетика ассоциациясининг (CNEA) «Хитой—2025: ядровий энергетикани ривожлантириш тўғрисидаги ҳисобот»ида маълум қилинган.
Ҳисоботда келтирилишича, ҳозирги пайтда Хитойда жами қуввати 113 миллион киловаттга тенг бўлган 102 та атом энергия блокидан фойдаланилмоқда, қурилиш босқичида турибди ёки қурилиши учун рухсат олинган. Бу кўрсаткич мамлакатни дунёдаги энг қудратли ядро энергетикасига эга давлат мақомига кўтарди.
2024 йилда Хитойнинг атом энергетикаси соҳасидаги электр ишлаб чиқариш ҳажми 444,7 миллиард киловатт-соатга етган. Шу тариқа, мамлакат ушбу кўрсаткич бўйича АҚШдан кейин иккинчи ўринни эгаллади. Бундан ташқари, атом энергияси мамлакатнинг умумий электр ишлаб чиқариши ҳажмининг 4,72 фоизини ташкил этган.
Шунингдек, ҳисоботда Хитой ҳозирги вақтда умумий ўрнатилган қуввати 33,65 миллион киловаттни ташкил этадиган 28 та янги атом энергия блокини қуриш ишларини жадал давом эттираётгани қайд қилинган. Мамлакат бу кўрсаткич бўйича кетма-кет 18 йилдан бери дунё етакчиси бўлиб келмоқда.
2023 йил июнь ойида Хитойда яна бир муҳим воқеа кузатилди — мамлакат тарихида илк бор торий реактори ишга туширилди. Хитой Ядро хавфсизлиги давлат бошқармаси илк 2 мегаватт қувватли торий реакторини фойдаланиш учун рухсат берганини South China Morning Post хабар қилган эди.
Мутахассисларнинг фикрича, торий ресурслари Хитойда жуда катта ҳажмда мавжуд ва айрим баҳолашларга кўра, ушбу захира мамлакатнинг энергетик эҳтиёжларини 20 минг йилдан ортиқ муддатгача таъминлашга етади.
Хитой атом энергетикасини ривожлантиришга алоҳида эътибор қаратишда давом этмоқда. Бу соҳадаги янги ютуқлар эса мамлакатнинг келгусида ҳам халқаро энергетика бозорида етакчилик қилишига замин яратмоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
15:39, 25-04-2025
