Ўзбекистонда энг кўп аҳоли яшайдиган вилоят аниқланди

Ўзбекистонда аҳоли сони бўйича янги рейтинг эълон қилинди, деб хабар берди Миллий статистика қўмитаси.

Маълумотларга кўра, мамлакатда аҳоли жиҳатидан энг катта ҳудуд — Самарқанд вилояти ҳисобланади. Бу ерда 4,3 миллиондан ортиқ киши истиқомат қилади.

Фарғона вилояти 4,2 миллион аҳолиси билан иккинчи ўринда турса, Қашқадарё вилояти қарийб 3,7 миллион киши билан учинчи поғонадан жой олган.

Аҳоли сони бўйича илк бешликни Андижон (3,5 млн) ва Тошкент шаҳри (3,1 млн дан ортиқ) тўлдирмоқда.

Наманган ҳамда Тошкент вилоятларида аҳоли сони ҳар бирида 3,1 миллион атрофида бўлиб, улар бешликдан кейинги ўринларни эгаллаган.

Энг кам аҳолига эга ҳудудлар сифатида Сирдарё вилояти (942 минг киши) ва Навоий вилояти (1,1 миллион киши) қайд этилган.

Қолган ҳудудлар орасида Қорақалпоғистон Республикаси, Бухоро ва Хоразм вилоятларида аҳоли сони тахминан 2 миллион атрофида.

Мутахассислар фикрича, аҳоли сонининг ўсиши шаҳар инфратузилмасини ривожлантириш, иш ўринлари ва ижтимоий хизматлар талабини янада оширмоқда.

Kamola Shuhratova

«ZAMIN.UZ» муҳаррири