Хитойда узоқ умр кўриш технологиялари бўйича илғор тадқиқотлар олиб борилмоқда. Маҳаллий Lonvi Biosciences лабораторияси қаришга қарши таблеткалар яратишда муҳим ютуқларга эришганини эълон қилди.
Ушбу препаратнинг асосий таркибий қисми – узум уруғи экстрактидан олинган процианидин C1 (PCC1) моддаси ҳисобланади. Шанхайлик олимлар олиб борган тадқиқотлар ушбу лойиҳа учун асос бўлди.
Улар PCC1 қўлланиши натижасида сичқонларнинг умр давомийлиги терапия бошланганидан кейин 64,2 фоизга ошганини аниқлашди. Бу бирикма сенолитик вазифасини бажариб, организмда тўпланадиган ва соғлом тўқималарга зарар етказувчи “зомби-ҳужайралар”ни танлаб йўқ қилади.
Lonvi Biosciences лабораторияси техника директори Лю Цинхуа ўз ишларининг истиқболига ишонч билдирди. “150 йил яшаш – бу мутлақо амалий мақсад. Яқин йилларда бу ҳақиқатга айланиши мумкин”, деди у The New York Times нашрига берган интервьюсида.
Компаниянинг прогнозларига кўра, ушбу таблеткаларни мунтазам қабул қилиш, соғлом турмуш тарзи ва сифатли тиббиёт хизматига эга бўлиш аввало инсоннинг 100 йилдан ошиқ умр кўришини таъминлаши, кейинчалик эса 120 йилгача етказиши мумкин.
Узоқ умр кўришга оид масалаларга давлат даражасида ҳам қизиқиш билдирилмоқда. Яқинда Россия Президенти Владимир Путин ва Хитой Раиси Си Сзинпин ўртасидаги инсон умрини 150 йилгача узайтириш имкониятларини муҳокама қилган суҳбат ҳақида хабар тарқалди.
Ушбу суҳбат видеога ёзиб олинган, бироқ кейинчалик Хитой давлат телевидениеси уни ўчиришни талаб қилгани жамиятда қўшимча резонанс уйғотди. Узоқ умр кўриш бўйича энг истиқболли йўналишлардан бири инсулинга боғлиқ сигнализация йўлларига алоқадор генларни ўрганишдир.
Олимлар думалоқ чувалчанг Caenorhabditis elegans генининг фақат битта мутацияси унинг умр давомийлигини икки баравар оширишини аниқлашди. Шунга ўхшаш генлар инсонда ҳам мавжуд бўлиб, бу қаришни секинлаштириш учун янги терапевтик ёндашувларни ишлаб чиқиш имконини очади.
Мазкур таблеткалар барча зарур синовлардан ўтиб, тегишли сертификатларни олганидан сўнг Ўзбекистонда ҳам рўйхатдан ўтиши мумкин. Бунинг учун компания мамлакатда ўз дори воситаларини сотиш учун бир қатор процедураларни бажариши керак бўлади.
Сўнгги тенденцияларга кўра, чет давлатларда эришилган деярли барча тиббий янгиликлар жуда тез Ўзбекистонга ҳам кириб келмоқда. Ўзбек шифокорлари тиббиёт ривожланишини диққат билан кузатиб, янги технологияларни имкони борича тез татбиқ этишга ҳаракат қилмоқда.
