Охирги икки йил ичида Хитойнинг бой фуқаролари орасида янги тенденция юзага келди — улар Сингапурдан воз кечиб, ўз маблағлари ва бизнесини Бирлашган Араб Амирликларига кўчирмоқда. Бу ҳақда Financial Times хабар берди.
Нашр ёзганидек, илгари Осиё сармоядорлари учун Сингапур энг оммабоп йўналиш бўлган. Аммо сўнгги пайтларда Дубай ва Абу-Даби янги “иқтисодий паноҳгоҳ”га айланган. Бугун хитойлик бизнесменлар нафақат бу ерда яшашни, балки доимий фуқароликка эга бўлишни ҳам мақсад қилишмоқда.
БАА ҳукумати маълумотларига кўра, 2022 йилнинг ўзида хорижликларга 80 мингга яқин “олтин виза” берилган. Бу виза фуқароларга узоқ муддатли яшаш ва ишлаш имконини яратади.
M/HQ компанияси бошқарувчиси Ян Мразекнинг айтишича, “кўплаб оилалар БААда янги сармоя лойиҳаларини йўлга қўйиш учун Сингапурдаги мулкларини сотишди”. Унинг таъкидлашича, пандемия пайтида Хитой ва Сингапурдаги қаттиқ карантин чекловлари кўплаб сармоядорларни БАА сари йўналтирган.
Экспертлар фикрича, БААни танлаётган хитойликлар нафақат солиқ имтиёзлари, балки хавфсиз муҳит, сифатли инфратузилма ва глобал бизнес алоқалари сабаб бу қарорни қабул қилмоқда. Шу тариқа, Дубай ва Абу-Даби охирги пайтларда Осиё бойлари учун янги “иқтисодий бошпана”га айланди.
“Zamin”ни Telegram'да ўқинг!
