Европа футбол бозори яна қизий бошлади. Испаниянинг икки етакчи клуби — “Барселона” ва “Реал Мадрид” бу сафар Бундеслига юлдузи Дайо Упамекано учун тўқнаш келиши мумкин, деб ёзмоқда Foot Mercato нашри. Манбаларнинг маълум қилишича, ҳар икки клуб ҳам ҳозирда “Бавария” сафида ўйнаб келаётган 26 ёшли француз ҳимоячини ўз таркибига қўшиб олиш режасини ишлаб чиқмоқда.
Маълумки, Упамеканонинг Мюнхен клуби билан амалдаги шартномаси якунланиш арафасида. “Бавария” раҳбарияти уни сақлаб қолиш мақсадида янги шартнома таклиф этган, бироқ ўйинчи талаб қилган маош ва шартлар клуб сиёсатига мос келмаган. Шу сабабдан жамоа раҳбарияти ҳам футболчининг кетиш эҳтимолини реал баҳоламоқда.
“Барселона” ва “Реал” бу вазиятдан фойдаланиш ниятида. Ҳар икки жамоа ҳимоя чизиғини мустаҳкамлаш учун янги ном излаётган бир пайтда, Упамекано улар учун жуда мос номзод сифатида кўрилмоқда. Айниқса, “Барселона” жамоасида сўнгги мавсумларда ҳимоядаги барқарорлик муаммолари тез-тез кузатилмоқда, “Реал” эса Карвахал ва Алаба каби тажрибали футболчиларнинг ёши катта бўлаётганини ҳисобга олмоқда.
Манбаларнинг таъкидлашича, январь ойи трансфер ойнаси очилиши билан ҳар икки клуб Упамекано билан тўғридан-тўғри музокара бошлашни режалаштирган. Бу борада илк қадамни “Барселона” ташлаши мумкинлиги айтилмоқда, зеро клуб спорт директори Деку унинг агентлари билан аввалдан алоқа ўрнатган.
Шу билан бирга, Упамеканога Испания грандигина эмас, балки Англия Премьер-лигасининг етакчи жамоалари ҳам жиддий қизиқиш билдирмоқда. Хусусан, амалдаги чемпион “Ливерпуль” ва анъанавий рақиби “Манчестер Юнайтед” ҳам француз ҳимоячисини ўз сафига қўшиб олиш вариантларини кўриб чиқмоқда.
Футбол экспертлари бу курашни қишки трансфер бозорининг энг қизиқарли битимларидан бири деб баҳоламоқда. Упамекано Европадаги энг тезкор ва жисмонан бақувват ҳимоячилардан бири сифатида танилган. Унинг позициядаги устунлиги ва пас аниқлиги жамоалар учун муҳим устунлик беради.
“Бавария” учун эса бу трансфер икки томонлама аҳамиятга эга бўлади. Бир томондан, клуб етакчи ҳимоячисини йўқотиши мумкин, иккинчи томондан эса 100 миллион евро атрофидаги кирим бу миқёсдаги жамоа учун молиявий наф келтиради.
Футбол мухлислари эса янги йилда Упамеканонинг тақдири қай йўналишда ҳал бўлишини қизиқиш билан кутмоқда. Француз ҳимоячисининг “Камп Ноу”дами, “Сантьяго Бернабеу”дами ёки Англия чемпионатидами дебют қилажаги ҳозирча сир бўлиб турибди. Бир нарса аниқ — унинг янги манзили футбол дунёсида катта шов-шув уйғотади.
“Zamin”ни Telegram'да ўқинг!
