Греция ва Албания чегараси яқинидаги сульфидга бой ғорда дунёдаги энг катта ўргимчак тўри топилди, деб хабар берди Live Science.
Мутахассислар маълумотича, улкан ерости колонияси 100 квадрат метрдан ортиқ майдонни эгаллаган бўлиб, бу ҳозиргача қайд этилган энг катта ўргимчак тўри ҳисобланади. Ғор ичи қоронғу, тор ва сульфидли дарё билан қопланган. Тўрнинг айрим қисмлари ипак оғирлиги сабабли девордан ажралиб тушган ҳолатда топилган.
Қизиғи шундаки, бу улкан тўрни ягона жонзот эмас, балки бир нечта турга мансуб минглаб ўргимчаклар биргаликда барпо этган. Асосий қисми Tegenaria domestica турига тегишли бўлиб, тахминан 69 мингдан ортиқ жонзотни ташкил этади. Улар одатда одам яшайдиган жойларга яқин муҳитда ҳаёт кечиради.
Колонияда шунингдек 42 мингга яқин Prinerigone vagans турига мансуб ўргимчаклар ҳам яшайди. Улар ярим соғлом муҳитда Т. domestica билан тинчликда ҳаёт кечириши ноёб ҳолат сифатида қайд этилган.
Жами 110 мингга яқин ўргимчак яшайдиган бу тўрда ўлжа сифатида майда ҳашоротлар — асосан Tanytarsus albisutus турига мансуб чирономидлар топилган. Улар сони 2,4 миллиондан ошади.
Олимлар таъкидлашича, бу гигант тўр қуёш нури кирмайдиган ерости экотизимида вужудга келган бўлиб, табиатдаги энг ноёб биологик ҳамжамиятлардан бири сифатида баҳоланмоқда.
“Zamin”ни Telegram'да ўқинг!
