Дональд Трампга қарши навбатдаги импичмент: Президент демократларни кескин танқид қилди

АҚШ президенти Дональд Трамп Демократик партия вакилларининг ўзини яна бир бор импичмент қилиш бўйича бошлаган ташаббусини қоралаб, буни сиёсий босим ва тўғридан-тўғри ҳужум, деб атади. Мамлакат раҳбари демократларнинг бу ҳаракатларига қарши кескин муносабат билдириб, республикачиларга ҳам ўз навбатида уларнинг қонунбузарликлари учун импичмент жараёнини бошлаш имкониятини кўриб чиқишни таклиф қилди. Бу ҳақда президент ўзининг "X" ижтимоий тармоғидаги шахсий саҳифасида маълум қилди.

“Демократлар бутунлай ўзини назорат қила олмай қолган. Радикал сўл қанот вакиллари яна бир бор импичмент мавзусини кўтармоқда. Ҳеч ким танимайдиган ва ҳеч ким ҳурмат қилмайдиган икки нафар конгрессмен яна Дональд Трампга импичмент эълон қилиш бўйича ташаббус билан чиқишди. Улар тахминан йигирманчи марта импичмент ҳақида гапиришмоқда, нима учун эканини ўзлари ҳам билмасдан”, деб ёзган Трамп ўзининг саҳифасида.

Трамп демократларнинг бу ҳаракатларини кинояли тарзда шарҳлаб, уларнинг мантиғига кўра, у мамлакат чегараларини ҳимоя қилгани, инфляцияга қарши кескин чоралар кўргани ҳамда Украина ва Эрон бўйича қаттиқ сиёсат юритгани учун айбланаётганини айтди. Унинг таъкидлашича, айнан унинг қатъий сиёсати Эроннинг молиялаштирилишини чеклаган ва агар бу қилинмаганида, 7 октябрь куни Исроилга қилинган ҳужум каби воқеалар юз бермаслиги мумкин эди.

Президентнинг таъкидлашича, Демократик партия вакиллари импичментдан қурол сифатида фойдаланмоқда ва “Америка учун муҳим бўлган барча қадриятларга қарши кураш олиб бормоқда”.

Бунинг ортидан Трамп партиядошларига ҳам қаратилган чақириқ билан чиқди: “Балким биз ҳам демократлар ўйнаётган ўйин қоидалари асосида ҳаракат қилиб, уларни ҳам ҳақиқий жиноятлари учун жавобгарликка тортиш ва Конгрессдан четлаштириш имкониятларини кўриб чиқишимиз керакдир?”

Эслатиб ўтиш жоизки, АҚШ президенти Дональд Трампга 2019 ва 2021 йилларда ҳам икки марта импичмент эълон қилинганди. Бироқ бу айбловлар Сенат томонидан қўллаб-қувватланмаган ва натижада президент ўз лавозимида қолганди.

Айни вақтда Америка оммавий ахборот воситалари янги импичмент уринишининг сабаби сифатида демократлар томонидан илгари сурилган ташқи сиёсат масалалари ва Конгрессга тазйиқ ўтказилгани каби айбловлар келтирилмоқда.

Жумладан, 29 апрель куни Демократик партия вакили, америкалик конгрессмен Шри Танедар президент Дональд Трампга қарши импичмент бўйича резолюция тақдим этган эди. Ушбу ҳужжатда қуйидаги айбловлар мавжуд: одил судловга тўсқинлик қилиш, халқаро тажовузкорлик, қонунга зид равишда идоралар ташкил этиш, коррупция ҳамда ҳокимият ваколатларини суиистеъмол қилиш.

Ҳозирда ушбу мавзудаги сиёсий тортишувлар АҚШ сиёсий доираларидаги асосий муҳокамалардан бирига айланган бўлиб, янги импичмент ташаббуси қандай якун топиши кўплаб таҳлилчиларнинг диққат марказида турибди. «Замин»ни Telegram’да ўқинг!