Ўзбекистон Миллий терма жамоаси сардори Отабек Шукуров Уругвайга қарши ўртоқлик баҳсидан сўнг журналистлар билан суҳбатда ўйин ҳақидаги фикрларини билдирди.
“Уругвай жаҳон футболида ўз ўрнига эга кучли жамоа. Бундай беллашувлар терма жамоа учун катта аҳамиятга эга, чунки мундиалда айнан шундай даражадаги рақибларга қарши тўп сурамиз. Ҳар бир йиғинда мана шундай ўйинлар ўтказишни истардим. Чунки бу баҳслар орқали Жаҳон чемпионати муҳитини ҳис қилиш мумкин. Бугунги ўйин биз учун бироз қийин бўлди, аммо қай ҳолатдамиз — шуни аниқ англаб олдик,” — деди Отабек Шукуров.
Шукуровнинг айтишича, бугунги учрашувда жамоа тўлиқ таркибда майдонга чиқа олмаган.
“Асосий таркибдаги етти нафар футболчимиз бугун иштирок эта олмади. Уругвайда ҳам шундай ҳолат кузатилди. Ўзим ҳам ҳозир тикланиш жараёнининг якуний босқичидаман. Улар майдонга “учинчи таркиб” билан тушди, лекин шунда ҳам жуда кучли жамоа эканлигини кўрдик,” — деди сардор.
Отабек, шунингдек, терма жамоа учун жисмоний ривожланиш муҳимлигини таъкидлади.
“Лотин Америкаси жамоалари жисмоний жиҳатдан жуда кучли. Биз эса Осиё жамоасимиз ва фақат ўз минтақамиздагиларга қарши эмас, балки Европа, Африка ва Лотин Америкаси жамоаларига қарши кўпроқ ўйнашимиз керак. Шунда жисмоний ҳолатимизни яхшилаймиз,” — дея қўшимча қилди Шукуров.
Отабекнинг сўзларига кўра, бу ўйин нафақат баҳс сифатида, балки келажакдаги Жаҳон чемпионатига тайёргарликнинг муҳим бир босқичи бўлди. Унинг таъкидлашича, Ўзбекистон терма жамоаси айнан мана шундай кучли рақибларга қарши баҳсларда тажриба орттириб, ўз салоҳиятини янада юксалтириши мумкин.
Манба: championat.asia
“Zamin”ни Telegram'да ўқинг!
