Хитойнинг ҳарбий қудрати билан боғлиқ янги маълумотлар халқаро майдонда жиддий хавотир уйғотмоқда. Reuters агентлиги Пентагон маълумотларига таяниб хабар беришича, Пекин Хитой ва Монголия чегарасига яқин ҳудудларда юздан ортиқ қитъалараро баллистик ракеталарни жойлаштирган.
Вашингтон таҳлилларига кўра, бу жараён фақат ҳозирги ҳолат билан чекланиб қолмайди. АҚШ томонининг баҳолашича, 2030 йилга бориб Хитой ихтиёридаги ядровий жанговар каллаклар сони мингтага яқинлашиши мумкин. Бу эса глобал стратегик мувозанатга жиддий таъсир кўрсатиши эҳтимолдан холи эмас.
Америка разведкаси маълумотларида таъкидланишича, Пекин 2027 йил охирига қадар армиясини Тайванга нисбатан эҳтимолий ҳарбий сценарийларга тайёрлашни режалаштирган. Бироқ экспертлар фикрича, Хитойнинг асосий устувор йўналиши тўғридан-тўғри қуруқликдаги босқин эмас, балки узоқ масофадан туриб зарба бериш имкониятларини кенгайтиришдан иборат.
Маълумотларга кўра, Пекин 1500–2000 денгиз мили масофада жойлашган нишонларга юқори аниқликда зарба бериш сценарийларини кўриб чиқмоқда. Бундай имкониятлар Хитойга минтақада стратегик устунлик бериш билан бирга, АҚШнинг Осиё–Тинч океани минтақасидаги таъсирини сезиларли даражада камайтиришга хизмат қилиши мумкин.
Reuters таҳлилчиларининг қайд этишича, кенг кўламли ҳарбий имкониятларнинг шаклланиши минтақавий барқарорликни издан чиқариш хавфини оширади. Бу ҳолат нафақат Осиё–Тинч океани ҳудуди, балки бутун дунё хавфсизлик тизими учун янги чақириқ сифатида баҳоланмоқда.
Қисқаси, Хитойнинг ядровий ва ҳарбий салоҳиятининг шиддат билан ўсиши глобал сиёсатда кучлар мувозанатини қайта кўриб чиқишни талаб қилувчи омилга айланиб бормоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
