Тўртта партия бирлашиб, ЎзЛиДеП киритган қонунни ўтказмади

^{Фото: Олий Мажлис Қонунчилик палатаси}
Олий Мажлис Қонунчилик палатасининг 29 апрел куни бўлиб ўтган ялпи мажлисида ЎзЛиДеП фракцияси депутатлари ишлаб чиққан — «Меҳнат кодексига хусусий сектор учун белгиланган ижтимоий мажбуриятларни эркинлаштиришга қаратилган ўзгартириш ва қўшимчалар киритиш тўғрисида»ги қонун лойиҳаси биринчи ўқишда концептуал жиҳатдан кўриб чиқилди.

Ташаббускорларга кўра, меҳнат қонунчилигида хусусий сектор учун ижтимоий мажбуриятлар кўплиги, соҳадаги ҳуқуқий механизмларни қайта кўриб чиқиш заруриятини юзага келтирмоқда.

«Амалдаги Меҳнат кодексида давлат ва хусусий секторда иш берувчилар учун бир хилдаги ижтимоий мажбуриятларнинг назарда тутилиши хусусий сектор, айниқса, кичик тадбиркорлик субъектларининг молиявий барқарорлигига сезиларли даражада таъсир кўрсатмоқда. Бу эса хусусий секторда ходимларни ишга қабул қилиш ва ишдан бўшатиш жараёнларининг расмий қайд этилмаслигига олиб келмоқда», дейилади қуйи палата хабарида.

Парламент қуйи палатаси сайтида қонун лойиҳаси тўлиқ эълон қилинмаган. Палата матбуот хизматига кўра, лойиҳада Меҳнат кодексига қуйидаги ўзгартириш ва қўшимчалар киритиш назарда тутилган:

• меҳнат шартномасини ходимнинг ташаббуси билан бекор қилишда аризани чақириб олиш жараёнида иш берувчининг иштирокини таъминлаш орқали томонларнинг масъулиятини ошириш;
  
• меҳнат шартномасини иш берувчи ташаббусига кўра бекор қилишда касаба уюшмаси қўмитаси ёки маҳаллий меҳнат органи билан келишиш жараёнларини соддалаштириш орқали хабардор қилиш тартибига ўтказиш;
  
• ходимнинг узоқ муддат меҳнатга қобилиятсиз бўлиши натижасида меҳнат шартномасини бекор қилиш асосларини такомиллаштириш;
  
• тадбиркорлик субъектларида ўриндошлик асосида фаолият юритаётган ходим билан меҳнат шартномаси бекор қилинганда огоҳлантириш муддати ва компенсация тўловларини бекор қилиш.
  

Мажлисда Меҳнат кодексига киритилаётган ўзгаришлар муҳокама ва баҳсларга сабаб бўлди ва етарли овоз тўплай олмади. Хусусан, қонун лойиҳасининг қабул қилинишига фақат ташаббускор партия – ЎзЛиДепнинг 57 нафар депутати овоз берган. Қолган депутатлар 4 та партиянинг барча депутатлари лойиҳага қарши овоз берган – 71 киши. Миллий тикланишдан 2 нафар депутат бетараф қолган. Биринчи ўқишда етарли овоз ололмаган қонун лойиҳаси ташаббускорларга қайтарилди.

«Миллий тикланиш» партияси ушбу қонун лойиҳасини ходим манфаатига зид деб атаган. Партияга кўра, лойиҳада асосан ходим эмас, иш берувчи – тадбиркорлар манфаатига устуворлик берилган.

«Яъни тенглик бузиляпти. Фракция либералларнинг тадбиркорларни ривожлантириш ғояларига қарши эмас, лекин ҳар қандай ривожланиш қадриятлар билан бўлиши керак! Биз маҳаллий тадбиркорларни қўллаб-қувватлаймиз, лекин бу ходимларнинг меҳнат ҳуқуқларини бузиш ҳисобига бўлмаслиги керак», дейилади партия баёнотида. «Замин»ни Telegram’да ўқинг!