Үндістанның солтүстігіндегі Химачал-Прадеш штатында қатты көшкін салдарынан қорқынышты апат болды. India Today хабарлауынша, Билапур ауданында 30 жолаушыны алып келе жатқан жеке автобус тау баурайындағы көшкіннің әсерінен толығымен көміліп қалған.
Ақпаратқа қарағанда, көшкін Баллу көпірі маңында болған. Маротан қаласынан Калауль бағытымен келе жатқан автобус қатты жаңбырдан кейін жылжып кеткен топырақ қабатының астында қалған. Қазір төтенше жағдайлар қызметі мен құтқарушылар іздестіру жұмыстарын қызу жүргізіп жатыр.
Ресми органдардың растаған мәліметі бойынша, әзірге 18 адамның мәйіті табылған. Іздестіру жұмыстары әлі толық аяқталған жоқ, өйткені аумақта әлі де көшкін қаупі бар.
Үндістан премьер-министрі Нарендра Моди оқиғадан қатты күйзелгенін айтып, қаза тапқандардың жақындарына қайғырып көңіл айтты. Сондай-ақ ол Премьер-министрдің көмек қорынан қаза тапқандардың отбасы мүшелеріне өтемақы төленетінін хабарлады.
Жергілікті ауа райы қызметінің мәліметінше, аймақтағы нөсер жаңбырдың салдарынан соңғы күндері көшкін саны күрт өскен. Үкімет азаматтарды абай болуға және таулы аймақтарда жүрмеуге шақырды.
“Zamin”-ді Telegram-нан оқыңыз!
