10 қазан, жұма күні АҚШ-тың Теннесси штатында орналасқан Accurate Energetic Systems (AES) зауытында қуатты жарылыс болды. Жергілікті биліктің хабарлауынша, кемінде төрт адам ауруханаға түсті, тағы 18 адам хабарсыз кетті.
Хамфрис округінің шерифі Крис Дэвис баспасөз конференциясында «бірнеше адам» қаза тапқанын айтты, бірақ нақты санды атамады. Fox News дереккөздеріне сүйене отырып, «көптеген адам қаза тапты» деп хабарлады.
Жарылыс болған зауыт Нэшвилл қаласынан шамамен 80 шақырым қашықтықта орналасқан. Оқиға орнына төтенше жағдай қызметтері мен жарылғыш заттарды залалсыздандыру мамандары жетті. Шерифтің айтуынша, екінші жарылыс қаупі бар және тергеу бірнеше күнге созылуы мүмкін.
«Біз мұнда бірнеше күн болуымыз мүмкін, жағдайды толық бақылауға алуымыз керек,» — деді ол.
Жарылыстың себебі әзірге белгісіз. Бірақ ресми мәліметтерге қарағанда, Accurate Energetic Systems зауыты қорғаныс өнеркәсібіне арналған жарылғыш заттар өндіруге маманданған.
1980 жылы құрылған компания әскери және коммерциялық мақсаттарда қолданылатын түрлі жарылғыш өнімдерді шығарады. The Washington Post басылымының жазуынша, AES АҚШ армиясына оқ-дәріге арналған порох, динамит, жаяу әскерге қарсы миналар және ірі калибрлі снарядтар компоненттерін жеткізіп келген.
Бұл зауыттағы алғашқы жарылыс емес. 2014 жылы осындай оқиға орын алып, бір адам қаза тауып, үшеуі жарақат алған.
Қазір оқиға орны қоршауға алынды, тергеу мен техникалық тексеріс жалғасуда. АҚШ билігі тұрғындарды жағдай тұрақталғанша аймақтан алыс болуға шақырды.
“Zamin”-ді Telegram-нан оқыңыз!
