АҚШ Иранның ядролық қаруға ие болуына қарсы

АҚШ президенті Дональд Трамп Иранға қатысты жағдай бойынша бірқатар қатаң мәлімдеме жасады. Оның айтуынша, Вашингтон Тегеранның ядролық қаруға ие болуына ешқашан жол бермейді.

Трамп Иранның әскери тұрғыдан айтарлықтай зардап шеккенін атап өтіп, ресми Тегеран мұны әлі толық түсінбеуі мүмкін екенін айтты. Сонымен қатар, ол АҚШ қаласа, екі апта ішінде Иран аумағындағы барлық нысандарды жойып жібере алатынын мәлімдеді.

АҚШ президентінің сөзінше, Иран басшылығының үш жоғары лауазымды өкілі жойылды. Дегенмен, ол қазір де белгілі бір өкілеттігі бар тұлғалармен диалог жүргізіліп жатқанын атап өтті.

Трамп сондай-ақ Иранның әскери әлеуеті айтарлықтай әлсірегенін баса айтты. Оның пікірінше, елде әскери-теңіз флоты, әуе күштері және әуе шабуылына қарсы қорғаныс жүйесі іс жүзінде қалмаған.

Мәлімдеме барысында Дональд Трамп генерал Қасым Сүлеймани туралы да пікір білдірді. Оның айтуынша, егер Сүлеймани жойылмағанда, Иран бүгін мүлдем басқа мемлекет болар еді. Трамп оны «қабілетті, бірақ зұлым данышпан» деп сипаттады.