«Талибан» неке жасы 9 жастан басталуы мүмкін деп мәлімдеді

The Times басылымының хабарлауынша, Ауғанстанда билік басындағы «Талибан» қозғалысы неке жасына қатысты жаңа тәртіпті мақұлдады. Онда қыздар балиғатқа толған сәттен бастап некеге тұра алатыны жазылғаны айтылуда.

Басылым мәліметінше, «Талибан» бұл жасты 9 жастан басталуы мүмкін деп түсіндірген. Тиісті құжат қозғалыс жетекшісі Хайбатулла Ахундзада тарапынан бекітіліп, режимнің ресми газетінде жарияланғаны хабарланды.

«Талибан» билікке келгенге дейін Ауғанстанда неке жасы қыздар үшін 16, ұлдар үшін 18 жас болып белгіленген еді. 15 жасқа толмаған қыздарды тұрмысқа беру заң бойынша жауапкершілікке әкеп соққан.

Халықаралық сарапшылар жаңа тәртіпті балалар құқығы мен қауіпсіздігіне төнген елеулі қауіп деп бағалауда. Олар бұл шешім кәмелетке толмаған қыздарға қатысты зорлық-зомбылық жағдайларын заңдастыру қаупін күшейтетінін атап өтуде.