Лионель Месси ресми түрде миллиардер футболшылар қатарына қосылды

Аргентиналық футбол жұлдызы Лионель Мессидің байлығы 1 миллиард долларға жеткені белгілі болды. Bloomberg хабарлауынша, оның табысы тек футбол мансабынан ғана емес, сонымен қатар жарнамалық келісімшарттар мен инвестициялар есебінен де артқан.

Мәліметтерге сәйкес, Месси 2007 жылдан бері тек жалақы мен бонустар арқылы 700 миллион доллардан астам табыс тапқан. Осылайша, ол Криштиану Роналдудан кейін миллиардер мәртебесіне жеткен екінші футболшы атанды.

Қазіргі таңда Месси АҚШ-тың «Интер Майами» клубында өнер көрсетуде. Оның клубтағы жылдық базалық жалақысы 25 миллион долларды, ал жалпы кепілдендірілген табысы 28,3 миллион долларды құрайды.

Сондай-ақ, футболшының келісімшартында клуб акцияларына иелік ету және Apple мен Adidas компанияларымен ынтымақтастықтан түсетін пайдадан үлес алу тармақтары да бар. Мессидің жылдық табысы шамамен 130 миллион долларға бағалануда.