Қырғызстан спутниктік интернет қолжетімді елдер қатарына қосылды

SpaceX компаниясының Starlink спутниктік интернет қызметі Қырғызстан аумағында ресми түрде іске қосылды. Компанияның интерактивті картасында елдің мәртебесі «available» — «қолжетімді» қатарына қосылды.

Қырғызстан үкіметі бұл жоба арқылы ең алдымен шалғай аудандардағы мектептерді, ауруханаларды және интернет инфрақұрылымы жетпеген елді мекендерді жоғары жылдамдықты интернетпен қамтамасыз етуді жоспарлап отыр.

Орталық Азияда Starlink қызметін алғаш болып Қазақстан 2025 жылдың тамыз айында іске қосқан болатын. Кейіннен жүйе Тәжікстанда да жұмысын бастады. Енді Қырғызстан да спутниктік интернетті пайдаланып жатқан мемлекеттер қатарына қосылды.

Бұған дейін премьер-министр Абдулла Арипов Өзбекстан 2026 жылы Starlink-ті сынақ ретінде іске қосуды жоспарлап отырғанын хабарлаған еді.