ДДСҰ ескертті: Әр бес адамның бірі қатерлі ісікке шалдығады

Дүниежүзілік денсаулық сақтау ұйымы (ДДСҰ) қатерлі ісік ауруына қатысты жаңа есебін жариялады. Онда медицинадағы елеулі жетістіктер мен жаңа емдеу әдістеріне қарамастан, бұл аурудың адамзат үшін ең үлкен қауіптердің бірі болып қала беретіні айтылған.

Ұйымның мәліметінше, әлемде әр бес адамның бірі өмірінде қатерлі ісікке шалдығуы мүмкін. Сондай-ақ халықтың шамамен 92 пайызы бұл аурумен өзі немесе жақындары арқылы бетпе-бет келеді.

ДДСҰ өкілі доктор Андре Ильбавидің айтуынша, соңғы жылдары қатерлі ісікті емдеуде маңызды ғылыми жаңалықтар ашылғанымен, науқастар әлі де ауыр физикалық, психологиялық және қаржылық қиындықтарды бастан өткеріп отыр.

Есепте мемлекеттер арасындағы медициналық мүмкіндіктер алшақтығының барған сайын ұлғайып келе жатқаны да атап өтілген. Бай елдерде сүт безі обырына немесе балалар обырына шалдыққан науқастардың 85 пайызы кемінде бес жыл өмір сүрсе, кедей мемлекеттерде бұл көрсеткіш 30 пайызға да жетпейді.

Қазір әлемде жыл сайын шамамен 20,6 миллион адамға қатерлі ісік диагнозы қойылады, ал 10 миллионға жуық адам осы аурудың салдарынан қайтыс болады. Мамандардың болжамынша, 2050 жылға қарай жаңа жағдайлардың саны 35 миллионға дейін өсуі мүмкін.

ДДСҰ мәліметтеріне сәйкес, табысы төмен мемлекеттерде қатерлі ісікке қарсы ең қажетті дәрілердің небәрі 9–54 пайызы бар. Кейбір елдерде сәулелік терапия жабдықтары мүлдем жоқ. Бұл диагноз қою және тиімді емдеу мүмкіндіктерін айтарлықтай шектеп отыр.

Мамандар тағы бір маңызды мәселеге назар аударды. Әлем елдерінің шамамен үштен екісінде қатерлі ісікті емдеу шығындарын мемлекет толық өтемейді. Емдеу құнының жоғары болуына байланысты кейбір өңірлерде науқастардың басым бөлігі емді аяқтамай тоқтатуға мәжбүр.

Сонымен қатар есепте оң жаңалықтар да келтірілген. Атап айтқанда, жатыр мойны обырының алдын алу және оны жою бойынша тиімді шешімдер пайда болғаны, көптеген елдерде темекі тұтынудың азайып келе жатқаны және ұлттық онкология бағдарламаларының кеңейіп жатқаны атап өтілген.

Халықаралық обырды зерттеу агенттігінің мамандарының пікірінше, қатерлі ісіктің әрбір он жаңа жағдайының төртеуі темекі шегу, алкоголь тұтыну, инфекциялар және артық салмақ сияқты алдын алуға болатын қауіп факторларымен байланысты.

ДДСҰ үкіметтерді алдын алу, ерте диагностика және емдеу жүйелерін күшейтуге, сондай-ақ қатерлі ісікке қарсы қызметтерді халық үшін қолжетімді әрі қаржылық тұрғыдан ыңғайлы етуге шақырды. Бұл арқылы миллиондаған адамның өмірін сақтап қалуға болатыны айтылды.