Бұхарада дарынды жас қыз инновациялық әрі практикалық маңызы бар жобаны әзірледі — ол кондиционер жүйесі бар «ақылды костюм» жасап шығарды. Бұл арнайы киім, әсіресе, аптап ыстықта ашық аспан астында жұмыс істейтін адамдарға арналған.
Бұл костюм күн батареялары арқылы қуатталады және ішіне орнатылған желдету жүйесінің көмегімен дене температурасын қалыпты ұстап тұруға қызмет етеді. Сонымен қатар, киім GPS-трекермен жабдықталған, бұл қызметкердің орналасқан жерін бақылауға және қауіпсіздігін қамтамасыз етуге мүмкіндік береді.
Мамандардың пікірінше, мұндай киімдер құрылыс, жол құрылысы, ауыл шаруашылығы сияқты салаларда еңбек ететін қызметкерлер үшін таптырмас дүние болуы мүмкін. Әсіресе, жаһандық климаттың өзгеруіне байланысты ыстық күндердің жиілеуі тұсында мұндай технологиялардың маңызы зор.
Жоба өз бағасын алып үлгерді және оны одан әрі дамыту үшін 1 миллиард сум көлемінде грант ұтып алды. Ендігі кезекте костюмдерді жетілдіру, өндіріске енгізу және көпшілікке ұсыну жоспарлануда.
Жақын болашақта бұл инновациялық өнім тек ішкі нарықта ғана емес, халықаралық деңгейде де өз тұтынушысын табады деп күтілуде.
