Антуан Семеньоның алғашқы таңдауы "Ливерпуль" болды

Шабуылшы Антуан Семеньо осы маусымда тұрақты және нәтижелі ойын көрсетуде. 25 жастағы футболшыға Англия Премьер-лигасының бірнеше беделді клубтары қызығушылық танытып отыр.

TEAMtalk басылымы The Guardian мәліметтеріне сүйене отырып, Семеньоның басты бағыты «Ливерпуль» екенін жазды. Оның тізімінде екінші орында «Манчестер Сити», үшінші орында «Манчестер Юнайтед» тұр.

Мәліметке сәйкес, Семеньо «Ливерпульмен» келісім іске аспаса ғана «Манчестер Ситиге» ауысу нұсқасын қарастырады. Ал «Манчестер Юнайтед» футболшы үшін күресте ең қиын жағдайда қалғаны айтылған.

Сондай-ақ, Семеньоның қазіргі келісімшартында 65 миллион фунт стерлинг көлемінде сатып алу тармағы бар екендігі хабарланған. Бұл сома шамамен 74 миллион еуроны құрайды.