Мадридтік «Реалдың» бас бапкері Альваро Арбелоа команда құрамындағы маңызды шешімдерінің бірі — неліктен оң қанаттағы қорғаныста тәжірибелі капитан Даниэль Карвахальға емес, Трент Александер-Арнольдқа сенім білдіріліп жатқанын егжей-тегжейлі түсіндіріп берді.
Бұдан бұрын Карвахаль өз наразылығын ашық білдіріп, ойын практикасының аздығынан алдағы Әлем чемпионатында Испания ұлттық құрамасының сапына кіру мүмкіндігіне қауіп төніп тұрғанын атап өткен болатын. Бұл жағдай жанкүйерлер арасында да қызу талқылауға себеп болды.
Ал Арбелоа бұл мәселеге қатаң әрі нақты ұстаныммен қарады. Оның айтуынша, командада алаңға шығу тек есімге немесе тәжірибеге емес, дәл қазіргі бабы мен пайдалы ойынына байланысты шешіледі.
— Трент қазір өте жоғары деңгейде өнер көрсетіп жүр және ол негізгі құрамда алаңға шығуға толықтай лайық. Оның әлеуеті мен ойыны күмән тудырмайды. Мен үшін әрбір кездесу шешуші маңызға ие — мұнда эксперимент жасау немесе біреуге «минут сыйлау» деген ұғым жоқ. Қай футболшыны таңдасам, демек оған сенемін және ол командаға жеңіс әкеледі, — деді испаниялық маман.
Статистика да бұл шешімнің белгілі бір дәрежеде қисынды екенін көрсетіп отыр. Ағымдағы маусымда Трент Александер-Арнольд «корольдік клуб» сапында 25 ойынға қатысып, 5 нәтижелі пас беріп, команда шабуылдарына айтарлықтай үлес қосты. Ал Карвахаль 20 кездесуге қатысқанымен, оның жалпы ойын уақыты 885 минутты құрады — бұл оның негізгі құрамдағы орны тұрақсыз екенін аңғартады.
«Реалда» бәсекелестік ең жоғарғы деңгейде екені анық. Арбелоа үшін есім емес, спорттық бабы басты фактор болып табылады. Ал Карвахаль үшін қазіргі жағдай — ескерту: егер ол негізгі құрамға қайта оралғысы келсе, ойынын жаңа деңгейге көтеруі тиіс.
Футболда бір ереже бар: егер бабыңда болсаң — ойнайсың. Қалғанының бәрі өткен тарих еншісінде.
“Zamin”-ді Telegram-нан оқыңыз!
