PSJ bas bapkeri Luis Enrike Manchester City ustazy Pep Gvardiola töńiregindegi habarlarǵa qatysty pikir bildirdi. Budan buryn «qalalylardyń» bas bapkeri maýsym sońynda óz qyzmetinen ketýi múmkin degen aqparattar taraǵan bolatyn. Bul habar fýtbol qoǵamdastyǵynda qyzý talqylandy.
Luis Enrike bul sózderge senbeýtinin ashyq aitty. Ispanııalyq maman Pep-tiń Manchester City-den ketýin qalamaıtynyn, kerisinshe, ony taǵy da kóptegen jyldar boıy eń joǵarǵy deńgeıde kórýdi qalaıtynyn jetkizdi.
«Men Pep Gvardiolanyń ketetinine senbeımin. Bunga senkim de kelmeıdi, óıtkeni onyń taǵy kóptegen jyldar qalýyn qalaımyn», — dedi Enrike.
PSJ ustazy Gvardiolamen baılanysty taǵy bir qyzyqty jaıtty eske aldy. Ol ulttyq quramada jumys istegen kezderinde Pep-tiń odan qurama bapkerligi týraly suraǵanyn aıtty. Enrikeniń oıynsha, Gvardiolada árqashan ulttyq quramany basqarý tilegi bolǵan. Alaıda ol Pep-tiń dál Italiıa quramasyn qabyldaıtynyna senbeıtinin, degenmen, mundaı yqtımaldyqty tolyqtaı joqqa shyǵarýǵa bolmaıtynyn bildirdi.
Luis Enrike Pep Gvardiolany óziniń bapkerlik qyzmetindegi eń úlken úlgilerdiń biri dep sanaıdy. Onyń oıynsha, Pep-tiń ulylyǵy tek júldeler sanymen ólshenbeıdi. Negizgi másele — onyń fýtbolǵa qalaı áser etkeni, oıynnyń sıpatyn qalaı ózgertkeni jáne basqalar batylsyzdyq tanytqan ıdeıalardy is júzinde qoldana alǵanynda.
«Pep-ti taǵy kóptegen jyldar boıy eń joǵarǵy deńgeıde kórýdi qalaımyn, óıtkeni ol — men úshin úlgi. Ol — barlyq dáýirdegi eń úzdik bapker», — dep atap ótti Enrike.
Ispanııalyq maman Gvardiolanyń fýtbolǵa engizgen taktıkalyq jańalyqtaryn da erekshe atap ótti. Ol ortalyq qorǵaýshylardy basqa pozıtsııalarda synap kórý, fýlbekterdi ortalyqqa yǵystyryp, búkil komanda qurylymyn jańa formada qurý sııaqty ıdeıalar dál Pep arqyly keń taraǵanyn aıtty.
Shynynda da, Gvardiola fýtbolǵa tek júldeler alyp kelgen bapker emes. Ol oıyn týraly kózqarasty ózgertken, komandalardyń alańda ornalasýyna, doppen qozǵalysyna jáne qorǵaýshylardyń mindetine basqasha máni bergen maman sanalady. Búgin kóptegen klýbtar onyń ıdeıalarynan shabyt alady, keıbireýleri ashyq túrde onyń stıliniń kóshirmesin jasaýǵa tyrysady.
Enrike ázil aralas, biraq máni bar túrde Pep bir kúni ortalyq qorǵaýshylardy da shabýylǵa qoıýy múmkin ekenin aıtty. Onyń oıynsha, eger Gvardiola solaı istese, tez arada basqa bapkerler de bul ıdeıany kóshire bastaıdy. Bul sózde asyrap aıtý bar sııaqty, biraq Pep-tiń fýtboldaǵy áserine qarasaq, mundaı stsenarıı de asa tańqalarlyq emes.
«Mundaı qabileti bar adamdar óte az. Tek tańdaýlylarda ǵana. Jáne bul turǵyda ol — birinshi nómirli», — dedi Luis Enrike.
Qysqasy, Enrike Gvardiolanyń ketýi týraly habarlarǵa senbeıdi jáne ony fýtbol tarıhyndaǵy eń uly bapker retinde baǵalaıdy. Onyń oıynsha, Pep tek jeńiske jetkeni úshin emes, fýtboldy jańa deńgeıge alyp shyqqan ıdeıalary úshin de erekshe orynǵa ıe. Fýtbolda júldeler ýaqyt óte sanǵa aınalady, biraq oıynnyń sıpatyn ózgertken jandardyń esimi uzaq jasaıdy.
“Zamin”-ді Telegram-нан оқыңыз!
