8 қаңтардан бастап Өзбекстанда метан отынын құю бекеттерінің жұмысына уақытша шектеу енгізіледі. Энергетика министрлігінің мәліметінше, АГНҚС-тар 10:00-ден 16:00-ге дейін жұмыс істейді. Бұл туралы podrobno.uz хабарлайды хабарлайды .
Шектеулер магистральдық газ құбырларындағы қысымның төмендеуімен түсіндірілді. Министрлік қазіргі жағдайда халықты және әлеуметтік сала нысандарын табиғи газбен тұрақты қамтамасыз ету басым міндет болып қала беретінін атап өтті.
Сондықтан жергілікті әкімдіктермен келісілген кестелер негізінде метан құю бекеттерінің жұмыс уақыты уақытша қайта қаралуда. Ал Ферғана аңғарында бекеттердің режимі газдың нақты қысымына қарай, жергілікті әкімдіктермен келісім бойынша жеке белгіленеді.
Энергетика министрлігі қысым төмендеген кезеңдерде ең алдымен тұрғын үйлерді, қоғамдық көлікті және әлеуметтік маңызы бар нысандарды үздіксіз газбен қамтамасыз етуге назар аударылатынын мәлімдеді. Қоғамдық көліктің тұрақты жұмысы және халықтың негізгі қажеттіліктерін өтеу басым бағыт болып қала береді.
Метан құю бекеттерінің жұмыс тәртібі газбен қамту бойынша жалпы жағдайға, қысым деңгейіне және тұтыну көлемдеріне қарай қайта қаралып отырады. Бұл шаралар газ ресурстарын ұтымды пайдалану және энергиямен қамтудың тұрақтылығын сақтауға бағытталған.
Министрлік шектеулердің уақытша екенін және қазір жүйедегі газ қысымын қалыпқа келтіру бойынша практикалық жұмыстар жүргізіліп жатқанын қоса айтты. Еске салайық, 25 желтоқсанда метан құю бекеттері алдындағы кезектер салдарынан Ташкентте кейбір автобустар маршруттан шығып кеткен еді.
“Zamin”-ді Telegram-нан оқыңыз!
