Toshkent davlat pedagogika universitetida yangi fakultet tashkil etiladi

  • 16 noyabr 2018, 10:27
  • 3 294
  • Jamiyat
  • Toshkent davlat pedagogika universitetida yangi fakultet tashkil etiladi
    Normativ-huquqiy hujjatlar loyihalari muhokamasi portalida “Nizomiy nomidagi Toshkent davlat pedagogika universiteti tarkibida O‘zbek-Belarus qo‘shma “Innovatsion pedagogika” fakultetini tashkil etish to‘g‘risida”gi prezident qarori loyihasi joylashtirildi.

    Hujjat bilan O‘zbekiston Respublikasi Oliy va o‘rta maxsus ta’lim vazirligi va Iqtisodiyot vazirligining Nizomiy nomidagi Toshkent davlat pedagogika universiteti tarkibida Belarus davlatining Maksim Tank nomidagi Belarus davlat pedagogika universiteti bilan hamkorlikdagi O‘zbek-Belarus qo‘shma “Innovatsion pedagogika” fakultetini tashkil etish to‘g‘risidagi taklifi ma’qullanishi mumkin.

    Quyidagilar fakultet faoliyatining asosiy vazifalari etib belgilanadi:

    uzluksiz ta’lim tizimi muassasalari uchun yuqori malakali pedagog kadrlarni milliy va xalqaro standartlar darajasida sifatli tayyorlashni ta’minlash;

    pedagogik ta’lim sohasini rivojlantirishning ilmiy-metodik vazifalarini hal etish, ilg‘or xorijiy pedagogik texnologiyalarni joriy qilishga yo‘naltirilgan ilmiy tadqiqotlarni olib borish va iqtidorli talaba-yoshlarni ilmiy faoliyat bilan shug‘ullanishga keng jalb etish;

    yurtimizning pedagogika fani bo‘yicha qadimdan rivojlanib kelgan yutuqlari, xorijiy mamlakatlar ta’lim muassasalarining tajribasi va respublika ta’lim muassasalarining talab-ehtiyojlarini hisobga olgan holda tegishli ta’lim yo‘nalishlari hamda mutaxassisliklari bo‘yicha o‘quv-uslubiy adabiyotlarni yaratish;

    o‘quv va ilmiy loyihalarni amalga oshirish, ta’lim va ilmiy izlanishlar jarayoniga mutaxassislarni keng jalb etish maqsadida pedagogika sohasidagi respublika va xorijiy yetakchi oliy ta’lim muassasalari va ilmiy markazlari bilan hamkorlik aloqalarini rivojlantirish;

    respublika va xorijiy oliy ta’lim muassasalari hamda ilmiy markazlariga istiqbolli yosh bitiruvchilarni magistratura va doktoranturaga muntazam yuborish orqali fakultetning ilmiy-pedagogik salohiyatini oshirib borish.

    Belgilab qo‘yilishicha:

    fakultet kadrlarga bo‘lgan ehtiyojni inobatga olgan holda ta’limning asosiy yo‘nalish (mutaxassislik)lari bo‘yicha bakalavr va magistrlar, ilmiy-pedagogik kadrlar tayyorlashni amalga oshiradigan, yuridik shaxs maqomiga ega bo‘lmagan Nizomiy nomidagi Toshkent davlat pedagogika universitetining tarkibiy bo‘linmasi hisoblanadi;

    fakultetda talabalarni o‘qitish to‘lov-kontrakt asosida rus tilida, kunduzgi ta’lim shaklida O‘zbekiston Respublikasi davlat ta’lim standartlari talablari inobatga olingan holda Maksim Tank nomidagi Belarus davlat pedagogika universitetida qabul qilingan ta’lim standartlari, o‘quv rejalari va dasturlari asosida amalga oshiriladi;

    fakultetga abituriyentlarni talabalikka qabul qilish va fakultet bitiruvchilarining attestatsiyasi Maksim Tank nomidagi Belarus davlat pedagogika universitetida belgilangan tartib, talablar va muddatlarga muvofiq, O‘zbekiston Respublikasi Oliy va o‘rta maxsus ta’lim vazirligi bilan kelishilgan holda amalga oshiriladi;

    fakultetda bakalavr ta’lim yo‘nalishlari va magistratura mutaxassisliklariga qabul kvotasi mavjud talab va ehtiyojdan kelib chiqib, Universitet va Maksim Tank nomidagi Belarus davlat pedagogika universiteti tomonidan O‘zbekiston Respublikasi Oliy va o‘rta maxsus ta’lim vazirligi bilan kelishgan holda belgilanadi;

    fakultetda o‘qish uchun to‘lov-kontrakt summasi bazaviy to‘lov-kontrakt summasidan kam bo‘lmagan miqdorda Universitet va Maksim Tank nomidagi Belarus davlat pedagogika universiteti tomonidan O‘zbekiston Respublikasi Iqtisodiyot hamda Oliy va o‘rta maxsus ta’lim vazirligi bilan kelishgan holda belgilanadi;

    fakultet bitiruvchilariga O‘zbekiston Respublikasi hamda Belarusda oliy ta’lim to‘g‘risidagi hujjat sifatida tan olinadigan, o‘zaro kelishuv asosida belgilangan namunadagi ikki tomonlama tan olinadigan Universitet va Maksim Tank nomidagi Belarus davlat pedagogika universiteti diplomlari beriladi.

    fakultet faoliyatini moliyalashtirish Universitetga talabalarni to‘lov-kontrakt asosida o‘qitishdan tushadigan mablag‘lar, yuridik va jismoniy shaxslarning homiylik xayriyalari, tegishli shartnomalar asosida manfaatdor tashkilotlar tomonidan taqdim etiladigan grantlar, shuningdek, qonun hujjatlarida ta’qiqlanmagan boshqa manbalar hisobidan amalga oshiriladi.

    Facebook орқали авторизация
    Ma'lumot

    Посетители, находящиеся в группе Гости, не могут оставлять комментарии к данной публикации.
    » » Toshkent davlat pedagogika universitetida yangi fakultet tashkil etiladi