Toshkentda yolg‘on yong‘in bahonasida aholidan pul yig‘ib, mashina olgan qiz bo‘yicha izoh berildi
Toshkent shahrida uyi yong‘indan zarar ko‘rgani haqida yolg‘on ma’lumot tarqatib, aholidan pul yig‘gan va keyinchalik avtomobil xarid qilgan 19 yoshli bloger qiz bilan bog‘liq holat yuzasidan rasmiy munosabat bildirildi. Ushbu masalaga Ichki ishlar vazirligi matbuot kotibi Shohrux G‘iyosov izoh berdi.
Ma’lum qilinishicha, joriy yil dekabr oyi boshida bloger ijtimoiy tarmoqlarda uyi go‘yoki yong‘in natijasida zarar ko‘rganini aytgan va xonadonni qayta tiklash uchun obunachilaridan moddiy yordam so‘ragan. Biroz vaqt o‘tib esa u yangi video joylab, o‘ziga avtomobil sotib olganini ma’lum qilgani jamoatchilikda jiddiy savollar va muhokamalarga sabab bo‘ldi.
Ichki ishlar organlari tomonidan mazkur shaxs bilan profilaktik suhbat o‘tkazilgan. Suhbat davomida bloger yong‘in haqidagi videolarni obunachilar sonini ko‘paytirish va moddiy manfaat ko‘rish maqsadida joylaganini ochiq tan olgan. Shuningdek, unga bunday xatti-harakatlar jamoatchilik orasida shov-shuv keltirib chiqarishi, odamlarni chalg‘itishi va jamiyatda salbiy munosabat uyg‘otishi mumkinligi tushuntirilgan.
Shohrux G‘iyosovning ta’kidlashicha, ayni paytga qadar blogerning ushbu harakatlari bo‘yicha rasmiy shikoyat yoki moddiy zarar yetgani haqida murojaatlar kelib tushmagan. “Agar uning xatti-harakatlaridan norozi bo‘lgan yoki o‘z manfaatlari buzilganini bildirgan fuqarolar murojaat qilsa, mazkur holat belgilangan tartibda ko‘rib chiqiladi va tegishli huquqiy choralar ko‘riladi”, — dedi IIV matbuot kotibi.
Qayd etish joiz, bu voqea ijtimoiy tarmoqlarda ishonch va mas’uliyat masalasi yana bir bor dolzarb ekanini ko‘rsatdi.
“Zamin”ni Telegramʻda oʻqing!
