D витамини дозасини ошириб юборишнинг хавфли оқибатлари

“Қуёшли витамин” организмда кўплаб муҳим физиологик функцияларни бажаради: қондаги калсий миқдорини керакли даражада ушлаб туради, рахит касаллигининг олдини олади, суяклар, тишлар ва тирноқларни мустаҳкамлайди. Шунинг учун вақти-вақти билан D витаминини ўз ичига олган маҳсулотлар ва қўшимчаларни истеъмол қилиш лозим.

^{Фото: Alamy}
Шифокорлар суяк ва мушаклар саломатлиги ва мустаҳкамлигини сақлаш учун кунига 10 микрограмм D витамини қабул қилишни тавсия этади. У ёғли балиқ, балиқ жигари, қизил гўшт, дон маҳсулотлари, тухум сариғи ва қўзиқорин ва бошқа маҳсулотларда мавжуд.

Ёз ойларида қуёш нури орқали D витаминини қабул қила оламиз. Октябрдан март ойининг бошигача бўлган даврда шифокорлар D витаминини алоҳида озиқ-овқат қўшимчаси сифатида қабул қилишни тавсия этади.

Аммо ҳар қандай витамин ва биологик фаол қўшимчаларни белгиланган дозадан ортиқ истеъмол қилиш интоксикацияга олиб келиши мумкин. Организмда D витамини миқдори ошиб кетганини билдирувчи бир нечта белгилар мавжуд.

^{Фото: Alamy}
Организмда тўпланган ҳаддан ортиқ D витамини суякларни заифлаштиради, юрак ва буйракларга шикаст етказади. D витаминининг ҳаддан ортиқ тўпланиши D гипервитаминози деб аталади. Бу касаллик кам учрайдиган, аммо жиддий патологиядир. Унинг натижасида буйракларда тошлар пайдо бўлиши мумкин.

D витамин кўпайиб кетиши буйракларга биринчи ўринда таъсир қилади ва тез-тез ҳожатга бориш эҳтиёжини келтириб чиқаради. Шунингдек, кўнгил айниши, қусиш, қоринда оғриқлар, заифлик ва энг ёмони сувсизланиш кабилар интоксикация аломатлари саналади. Буларнинг барчаси жиддий симптомлар бўлиб, уларни бееътибор қолдириш жиддий асоратларга олиб келади. Патологияни ўз вақтида аниқлаш ва тиббий ёрдам кўрсатиш орқали жиддий касалликларнинг олдини олиш мумкин, дейилади АҚШ Соғлиқни сақлаш миллий институти томонидан ўтказилган тадқиқот материалларида. «Замин» янгиликларини «Вконтакти»да кузатиб боринг