Zilzila qurbonlari soni 17 mingdan oshdi, Erdoʻgʻan rasmiylarning xatolarini tan oldi

^{Foto: Reuters}
Turkiya prezidenti Rajab Toyyib Erdoʻgʻan mamlakat janubi-sharqi va qoʻshni Suriyadagi kabi vayronkor zilzilaning oldini olish imkoni boʻlmasligi haqida gapirdi.

Soʻnggi rasmiy ma'lumotlarga koʻra, Turkiyada zilzila oqibatida halok boʻlganlar soni 14 014 nafarga etdi, jarohatlanganlar esa 62 914 nafar. 6444 bino shikastlangan.

Reuters mahalliy rasmiylarga asoslanib, Suriyada kamida 3480 kishi halok boʻlganini xabar qilgan. Suriya davlat nashrlari 300 mingga yaqin kishi boshpanasiz qolganini xabar qilgan.

Shu tariqa ikki mamlakatda tabiiy ofatning jami qurbonlari soni 17 mingdan ortiqni tashkil etmoqda.

Qidiruv-qutqaruv amaliyotlarida 110 mingdan ortiq kishi harakatlanmoqda, shuningdek Turkiyaga boshqa mamlakatlardan 5 mingdan ortiq qutqaruvchilar yordamga kelgan.

JSST tabiiy ofat ushbu mintaqada yashovchi 23 mln kishiga, jumladan 1,4 mln bolaga bevosita ta'sir qilganini ma'lum qilgan.

Erdoʻgʻan halokat hududida

Rajab Toyyib Erdoʻgʻan 8 fevral kuni avvaliga Qahramonmarashga kelib, jabrlanuvchilar bilan uchrashdi. Keyin Hatay viloyatida ham boʻldi.

Tanqidchilari uning hukumati falokatga juda imillab reaktsiya qilgani va bunday vaziyatga yaxshi tayyorlik koʻrmaganini aytishmoqda.

Turkiya prezidenti «ayrim muammolar»ni tan olgan, ammo hozirda, uning soʻzlariga koʻra, vaziyat nazorat ostida.

Mamlakatdagi eng yirik muxolif partiya etakchisi Kamol Qilichdoroʻgʻli esa unga qoʻshilmaydi. «Agar buning bari uchun javobgar bir shaxs boʻlsa, bu Erdoʻgʻandir», deya qayd etgan u.

Erdoʻgʻan hozirgi sharoitda oʻzaro ayblovlar emas, balki birlik kerakligini ta'kidlagan. «Men bunday vaziyatda kimdir oʻz siyosiy manfaatlari yoʻlida negativ piar qilishiga toqat qila olmayman», degan tez-tez avtoritar tendentsiyalarda ayblanadigan prezident.

^{Foto: REFIK TEKIN/EPA}
Zilziladan keyingi toʻrtinchi kunda ham xarobalar ostida odamlar qolmoqda, falokat hududlarida esa harorat noldan pasaygan, bu esa vayronalar ostidan odamlarni tirik holda topishga boʻlgan umidlarni yanada kamaytiradi.

Bundan tashqari, omon qolganlar boshpanalaridan ayrilgan va koʻchalarda tunashga majbur boʻlishmoqda. JSST bunday holatda odamlar muzlab qolishi mumkinligidan ogohlantirmoqda.

«Agar qutqaruvchilar kabi gʻayrat bilan harakat qilinmasa, ikkinchi ofatning real xavfi bor, bu kutilganidan koʻproq odamlarga zarar etkazishi mumkin», degan JSSTning zilzilalar oqibatlarini bartaraf etish boʻlimi boshqaruvchisi Robert Holden.

Qoʻshni Suriyada esa vaziyat yanada ogʻirroq. Zilzilaga qadar Turkiya bilan chegarada faqat Bob al-Hava nazorat-oʻtkazish punkti ochiq edi. Endi esa u ham yopilgan, chunki zilzila tufayli unga olib boruvchi yoʻlda harakatlanib boʻlmay qolgan.

BMT yoʻl tez orada ta'mirlanishidan umid qilmoqda. Turkiya hukumati ham tez orada yana ikkita nazorat-oʻtkazish punkti ochilishini ma'lum qilgan.

Suriya shimolida Asad rejimi emas, muxolifat kuchlari nazorat qiladigan soʻnggi anklav qolgan. Koʻp yillik fuqarolik urushi vaqtida vayronaga aylangan ushbu hudud zilzila tufayli yanada ogʻir holatda qolgan.

Birgina Idlib viloyatida 1500 kishi halok boʻlgani ma'lum.

Asadning atrofidagilar Gʻarbning rejimga qarshi sanktsiyalari ofatni yanada kuchaytirmoqda. «Bizda buldozerlar etishmaydi, bizda kranlar etishmaydi, bizda neft etishmaydi, va barchasi Evropa va Amerika sanktsiyalari tufayli», - degan Bashar Asadning maslahatchisi Butaina Shabaan. “Zamin” yangiliklarini “Telegram”da kuzatib boring