Hindistonning Haydarobod shahrida o‘tkazilgan tezkor reyd chog‘ida odam savdosi bilan shug‘ullangan jinoiy guruh qo‘lga olindi.
Reyd natijasida uch nafar ayol, jumladan, bir o‘zbekistonlik fuqaro ham ozod etilgan. Ular yuqori daromadli ish va’dasi bilan bu mamlakatga jalb etilgan, ammo keyin jinsiy ekspluatatsiyaga majburlangan.
Tergov ma’lumotlariga ko‘ra, jinoyat sxemasini “Style Maker” go‘zallik saloni sobiq egasi — 36 yoshli Sharif ismli erkak tashkil etgan. U ishsiz ayollarni ijtimoiy tarmoqlarda topib, ularni turli bahonalar bilan Haydarobodga olib kelgan.
Politsiya Banjara Hills tumanidagi mehmonxonaga reyd o‘tkazib, 5950 rupiy naqd pul, 13 dona mobil telefon va boshqa ashyoviy dalillarni musodara qilgan. Shuningdek, tashkilotchi, mehmonxona xodimlari va yetti mijoz qo‘lga olingan.
Huquqni muhofaza qiluvchi organlar ayollarning xavfsizligini ta’minlash uchun ularni tibbiy va psixologik kuzatuv ostiga olgan. Rasmiylar o‘zbekistonlik ayolni tez orada vatanga qaytarish bo‘yicha hamkorlikni boshlagan.
Bu voqea yana bir bor xorijda “ish” topish niyatida chalg‘igan ayollarni ogohlantiradi — yolg‘on va’dalar ortida inson savdosi turgan bo‘lishi mumkin. Jamiyatning bunday jinoyatlarga befarq bo‘lmasligi esa har bir insonning hayotini asrash demakdir.
“Zamin”ni Telegramʻda oʻqing!
