Apple’ning uzun vaqt tayyorlab kelgan yangi konsepsiyasi — yupqa korpusli iPhone Air — bozorda kutilgan darajadagi qiziqishni uyg‘otmadi. 2025 yil 28 noyabr kuni Digitimes Asia tarqatgan ma’lumotlarga ko‘ra, ushbu modelning ommabop bo‘lmasligi nafaqat Apple’ning o‘zi, balki Xitoydagi yirik smartfon ishlab chiqaruvchilarning ham yupqa smartfonlar yaratish borasidagi ishtiyoqini pasaytirdi.
Ma’lumotlarga qaraganda, iPhone Air savdosidagi past ko‘rsatkich Samsung‘ning vaqt o‘tib Edge seriyasidan voz kechishini ham yanada oydinlashtirgan. Ya’ni, tarmoqdagi yirik o‘yinchilar bu form-faktorga bo‘lgan talabning sezilarli darajada pasayganini anglab yetishgan.
Nikkei Asia xabarida ta’kidlanishicha, Apple dastlab ishlab chiqarish hajmini ancha optimistik rejalar asosida belgilagan, ammo bozorning salbiy kayfiyatidan so‘ng kompaniya majburiy ravishda bu hajmni keskin qisqartirgan. Bu esa yupqa dizayn konsepsiyasi sohasida kompaniya uchun katta signal bo‘ldi.
The Information yozishicha, iste’molchilar tomonidan kutilgan darajada talab bo‘lmagani tufayli iPhone Air’ning ikkinchi avlodini chiqarish rejasi noma’lum muddatga yo‘qqa chiqarilgan. Ya’ni, yangi versiya hozircha ishlab chiqarilmaydi, loyiha vaqtincha sovutilgan holda qoldirilgan.
Shu bilan birga, manbalar ta’kidlashicha, Apple yupqa korpusli gadjetlar g‘oyasidan mutlaqo voz kechmoqchi emas. Kompaniya bu dizayn yo‘nalishini vaqtincha qayta ko‘rib chiqmoqda, istiqbolda texnologiyalar yaxshilanishining kutilayotgani bois bunday turdagi smartfonlar yana kun tartibiga qaytishi mumkin.
Yana bir jihati shundaki, Apple bunday qaror bilan o‘z mahsulot portfelini muxlislar intiqlik bilan kutadigan darajada muvozanatda ushlab turishni maqsad qilgan. Bu esa kompaniyaga bozor talabi, fan-texnika imkoniyatlari va foydalanuvchilar rag‘bati o‘rtasida yanada samarali yo‘l tanlash imkonini beradi.
Aftidan, iPhone Air atrofidagi vaziyat Apple’ning o‘z strategiyasini tubdan qayta ko‘rib chiqishiga olib kelgan muhim tajriba sifatida tarixda qoladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
