Timur Kapadze boshqaruvidagi Namanganning “Navbahor” jamoasi yangi mavsum oldidan seleksiya ishlarini jadal davom ettirmoqda. “Lochinlar” bu safar hujum chizig‘ini kuchaytirish maqsadida tajribali qanot hujumchisi Vanya Ilich bilan shartnoma imzoladi. Bu haqda klub matbuot xizmati rasman ma’lum qildi.
Klubning qayd etishicha, yangi transfer jamoaga tezlik, dribling va qanot orqali hujumlarni o‘tkirlashtirishda yordam berishi kutilmoqda. Ayniqsa, Kapadzening tezkor o‘yin uslubiga mos tushadigan vinger — “Navbahor” muxlislari kutgan qo‘shimcha kuch bo‘lishi mumkin.
Serb futbolchisi haqida qisqacha
Vanya Ilich 1999 yil 3 yanvar kuni Serbiya poytaxti Belgrad shahrida tavallud topgan. Futbolchilik faoliyati davomida u o‘z yurtida bir qator klublar sharafini himoya qilgan:
- “Rad” (Belgrad) — 2018–2020
- “OFK Jarkovo” (Belgrad) — 2021–2022
- “Radnichki” (Nish) — 2021–2022, 2023–2025
- “Kolubara” (Lazarevas) — 2022–2023
Qisqasi, “Navbahor” tarkibiga yana bir xorijlik futbolchi kelib qo‘shildi va bu transfer yangi mavsumda jamoaning hujumdagi “tishini o‘tkirlash”i mumkin. Endi eng qizig‘i — Ilich Namanganda qanchalik tez moslashadi va qanotda qancha “shov-shuv” qiladi? Mavsum boshlansa, hammasi aniq ko‘rinadi.
“Zamin”ni Telegramʻda oʻqing!
