Berlin Rossiya hukumatiga nisbatan qattiq bayonot berdi. Germaniya hukumati rasmiy vakilining o‘rinbosari Shteffen Mayer 2026 yil 21 yanvar kuni Berlindagi matbuot anjumanida Rossiya Ukraina energetika tizimiga doimiy zarbalar berib, “sovuqni qurol sifatida ishlatyapti”, deya ta’kidladi va bu holatni harbiy jinoyatlar bilan bog‘ladi.
Mayerning so‘zlariga ko‘ra, qariyb to‘rt yilga yaqin davom etayotgan to‘liq ko‘lamli urushning mantig‘i Ukrainani zaiflashtirish, holdan toydirish va aholini har kuni omon qolish kurashiga majbur qilishga qaratilgan. Germaniya tomoni “davom etayotgan ommaviy havo zarbalari”ni eng keskin shaklda qoralaganini ham alohida qayd etdi.
Kiyevda vaziyat og‘irlashgani aytilmoqda
Ukraina tomoni va xalqaro manbalar oxirgi haftalarda energetika obyektlariga uyushtirilayotgan hujumlar oqibatida poytaxt Kiyevda ta’minot muammolari keskinlashganini yozmoqda. Reuters xabariga ko‘ra, zarbalardan keyin Kiyevda deyarli 60 foiz hududda elektr ta’minoti izdan chiqqan, 4 mingdan ziyod bino isitishsiz qolgan.
Shu bilan birga, Reuters Ukraina buni urush boshlanganidan buyongi eng “qattiq” qishlardan biri sharoitida boshdan kechirayotganini, energiya va isitish tizimiga berilgan zarbalar aholining kundalik hayotini og‘irlashtirayotganini qayd etgan.
“Shahardan chiqib keting” chaqiriqlari
Kiyev rahbariyati bir necha kun oldin aholini imkoni boricha shahar tashqarisiga chiqib ketishga chaqirgani, Kiyev meri Vitaliy Klichko esa AFP’ga bergan intervyusida yanvar oyi davomida poytaxtni 600 ming kishi tark etganini aytgani haqida ham xabarlar tarqaldi.
Berlinning pozitsiyasi nimani anglatadi
Germaniya bayonotidagi asosiy urg‘u — hujumlar harbiy maqsadlar bilan cheklanib qolmayotgani, fuqarolik infratuzilmasiga ta’sir qilib, odamlarni qorong‘u uylarda, isitish va issiq suvsiz qoldirishi haqida. Berlin bunday usulni “g‘ayriinsoniy” deb atab, xalqaro gumanitar huquq nuqtayi nazaridan keskin baholadi.
Hozirgi manzara shunday: qishning sovug‘i odatda tabiat sinovi bo‘ladi, lekin energiyaga zarbalar davom etsa, u allaqachon geosiyosiy bosim vositasiga aylanib ketadi. Va bu holatda eng katta yuk, har doimgidek, oddiy odamlarning yelkasiga tushyapti.
“Zamin”ni Telegramʻda oʻqing!
