Petropavlovsk-Kamchatskiyda qish bu yil “oddiy mavsum” emas, haqiqiy sinovga aylandi. «Kamchatka-Inform» agentligi hududiy gidrometeomarkazga tayanib xabar berishicha, 2025-yil dekabr oyida mintaqada 370 mm yog‘in tushgan — bu oylik me’yorning 316 foizi degani. 2026-yil yanvarining birinchi yarmida esa shaharga yana 163,6 mm qor yog‘gan — bu esa oylik normaning 150 foiziga teng.
Natija ko‘z o‘ngida: shaharda qor qoplami balandligi 170 smgacha yetgan, ayrim hududlarda esa 2,5 metrdan ham oshgan. Ijtimoiy tarmoqlarda esa mahalliylar “5 metrgacha chiqqan qor uyumlari” haqida yozmoqda — bu gaplar hazildek tuyuladi, lekin vaziyat hazil emas.
Favqulodda rejim, ko‘chki xavfi va “qordan chiqish” operatsiyasi
Petropavlovsk-Kamchatskiyda munitsipal miqyosda favqulodda vaziyat rejimi hali ham amal qilmoqda. 17-yanvarga kelib siklonlar chekina boshlagani aytilsa-da, mintaqada qor ko‘chkisi xavfi bo‘yicha ogohlantirish saqlanib qolgan. Faqat dushanbaga o‘tar kechasi shahar ko‘chalaridan 2,5 ming kub metr qor olib chiqib ketilgan.
Kamchatgidromet rahbari Vera Polyakova so‘nggi bir yarim oydagi ob-havo sharoitini ekstremal toifa deb atab, bu kabi holatlar juda kam uchrashini aytgan. Uning ta’kidlashicha, bu darajadagi miqyos oxirgi bor 1970-yillar boshlarida qayd etilgan — o‘shanda qisqa muddatda bir necha oylik yog‘ingarchilik to‘planib qolgan.
Transport to‘xtadi, odamlar maxsus avtobuslarda tashildi
“Qor kollapsi” fonida shaharda yo‘lovchi avtobuslar harakati bir muddat to‘xtab qolgan. Odamlarni Rosgvardiya avtozaklari va obodonlashtirish xizmatlariga mo‘ljallangan maxsus avtobuslarda tashishgan. Faqat 17-yanvardan boshlab avtobuslar harakati ma’lum cheklovlar bilan qayta tiklangan.
Qor uylarga kirdi: qutqaruvchilar, harbiylar, qimmat xizmatlar
Ayrim uylar atrofini qor bosib, aholi tom ma’nosida “qamalib” qolgan. Hududlarni tozalashda qutqaruvchilar va harbiylar yordam bermoqda. Shu bilan birga, bozor ham darrov javob qaytargan: «Avito»da uy va mashinani qordan tozalash xizmatlari narxi 80 ming rublgacha ko‘tarilgani aytilmoqda.
Qor yog‘ishi kuchaygani sabab chiqindi tashish ham deyarli izdan chiqqan: kommunal texnikalar qor bosgan hovlilarga kira olmayapti. Hududiy muassasalar va maktablar esa masofaviy ish rejimiga o‘tkazilgan.
Afsuski, fojiali holatlar ham bor: 15 yanvar kuni mahalliy rasmiylar tomlardan tushgan qor sabab ikki kishi halok bo‘lganini ma’lum qilgan. Do‘konlar atrofida ayrim mahsulotlar tanqisligi, yirik savdo nuqtalarda navbatlar paydo bo‘lgani ham qayd etilmoqda. Rasmiylar esa do‘konlarni aylanib, eng zarur tovarlar bor-yo‘qligini nazorat qilib bormoqda.
Ogohlantirishlar, ko‘ngillilar va tartib-qoidalar
Hokimiyat aholini ovoz kuchaytirgichlar orqali ogohlantirib, zururatsiz uydan chiqmaslikni tavsiya qilmoqda. Favqulodda shtab negizida tashkil etilgan ko‘ngillilar guruhi esa nafaqaxo‘rlar, nogironligi bo‘lgan shaxslar, ko‘p bolali oilalar va Ukraina urushi qatnashchilarining oilalariga hududni qordan tozalash, oziq-ovqat va dori-darmon yetkazib berishda yordam ko‘rsatmoqda.
19 yanvar kuni Kamchatka gubernatori Vladimir Solodov komissiya yig‘ilishidan keyin shahardagi muhim yo‘llar va kvartallar o‘rtasidagi o‘tish yo‘llarini tezkor tozalashni buyurgan. Shuningdek, YHXB xodimlari eng gavjum chorrahalarda harakatni qo‘lbola tartibga solishni boshlagan.
Videolar, haqiqiy kadrlar va sun’iy intellekt “qo‘shgan” fantaziyalar
Kamchatka aholisi ijtimoiy tarmoqlarda bu og‘ir sharoitdagi hayotni aks ettirgan videolarni faol joylashtirmoqda: tez yordam xodimlari qor uyumlari va qor bosgan podyezdlardan bemor oldiga yetib borishga urinayotgani, odamlar ba’zan derazalar orqali chiqib ketishga majbur bo‘layotgani, mashinalarni qor ichidan qutqarish jarayonlari — barchasi real hayot kadrlari.
Shu videolar keng tarqalgan bir paytda, internetda sun’iy intellekt yaratgan “ekstremal” roliklar ham paydo bo‘ldi: unda go‘yo qor uyumlari to‘qqizinchi qavatgacha chiqqani, odamlar esa uyidan “toyib” tushayotgani ko‘rsatiladi. Lekin haqiqiy manzaraning o‘zi ham yetarlicha qattiq — bu yerda ortiqcha dramatizatsiya shart emas.
Xulosa qilib aytganda, Petropavlovsk-Kamchatskiydagi vaziyat hali to‘liq yumshaganicha yo‘q: qor kamayishi boshlangan bo‘lsa-da, xavf-xatarlar saqlanmoqda. Bugungi eng to‘g‘ri strategiya — qoidalarga amal qilish, ehtiyot bo‘lish va bir-birini tashlab qo‘ymaslik. Bu qish Kamchatka uchun “mavsum” emas, tarixga kirib qolayotgan voqea.
“Zamin”ni Telegramʻda oʻqing!
