Toshkent shahar Yo‘l harakati xavfsizligi boshqarmasi poytaxt aholisini qorli ob-havo kuzatilayotgani sabab ehtiyot bo‘lishga chaqirdi.
Boshqarma qayd etishicha, Toshkent shahrida qorli ob-havo kuzatilayotgani tufayli yo‘llarda xavfsizlikni ta’minlash va yuzaga kelishi mumkin bo‘lgan ko‘ngilsiz hodisalarning oldini olish maqsadida fuqarolardan bir qator muhim talab va tavsiyalarga qat’iy rioya qilish so‘ralgan.
Xususan, haydovchilar va yo‘l harakati ishtirokchilaridan:
-yo‘l harakati qoidalariga qat’iy amal qilishni;
-oraliq masofani saqlashni;
-tezlikni belgilangan me’yordan oshirmaslikni;
-yo‘llarda harakatlanayotgan piyodalarni hurmat qilgan holda, ehtiyotkorlik bilan harakatlanishni so‘ragan.
Shu bilan birga, rasmiy xabarda yana bir muhim ogohlantirish ham berilgan: “Shu bilan birgalikda, avtomobillarni ko‘p qavatli bino va inshootlar, shuningdek daraxtlar tagida qoldirmaslikni va maxsus turargohlarda transport vositalarini saqlashingizni so‘rab qolamiz”, deyiladi xabarda. Qorli va nam havoda tomdan muz bo‘laklari tushishi yoki daraxt shoxlari sinishi ehtimoli bor — shuning uchun “men tez chiqib ketaman” degan reja bu yerda ishlamaydi.
Eslatib o‘tamiz, O‘zgidromet 22–24-yanvar kunlari O‘zbekiston hududiga nam va sovuq havo massalari kirib kelishi haqida ogohlantirgandi. Shu bois, yo‘lda ham, piyoda harakatda ham ortiqcha shoshilmasdan, ehtiyot choralarini kuchaytirish tavsiya etiladi.
“Zamin”ni Telegramʻda oʻqing!
