Yaqin Sharqdagi keskinlik ortidan yuzaga kelgan global ta’sirlar endi Osiyo davlatlarida ham jiddiy muammolarni keltirib chiqarmoqda. The Washington Post nashri xabariga ko‘ra, AQSH va Isroilning Eronga qarshi harakatlari oqibatida yoqilg‘i ta’minotida uzilishlar kuzatilmoqda.
Natijada qator Osiyo mamlakatlarida yoqilg‘i tanqisligi kuchayib, ijtimoiy vaziyat keskinlashmoqda. Ayrim hududlarda vahima, talon-taroj va hatto zo‘ravonlik holatlari qayd etilgan.
Xususan, Bangladeshda noqonuniy guruhlar yoqilg‘i zaxiralarini o‘g‘irlab, transport vositalarini talon-taroj qilmoqda. Bu esa aholi o‘rtasida xavotir va beqarorlikni yanada kuchaytirgan.
Hindiston va Pokistonda esa yoqilg‘i taqchilligi sababli norozi aholi tomonidan hujumlar sodir etilgan. Ayrim holatlarda yoqilg‘i quyish shoxobchalari xodimlari halok bo‘lgani haqida ma’lumotlar bor.
Shu bilan birga, Filippinda minglab haydovchilar dizel narxlarining keskin oshishiga qarshi ish tashlash aksiyalarini boshlagan. Bu esa transport tizimida qo‘shimcha muammolarni keltirib chiqarmoqda.
Mutaxassislar fikricha, global energetika bozoridagi beqarorlik davom etsa, bunday holatlar yanada ko‘payishi mumkin. Ayni paytda vaziyatni barqarorlashtirish uchun xalqaro hamkorlik va tezkor choralar talab etilmoqda.
“Zamin”ni Telegramʻda oʻqing!
