Laylatul qadr qanday kecha?

Laylatul qadr – “belgilash kechasi” degan ma'noni anglatadi. Qadr kechasida sokinlik hukm suradi. Atrof musaffo, yorugʻ, xuddi sukunatga oʻralgan yogʻduli oy charaqlab turgandek boʻladi.

Laylatul Qadr yil davomida qilinadigan turli amallar, hukm, topiladigan rizq, bir soʻz bilan aytganda taqdir belgilanadigan kechadir.

Bu kecha haqida Alloh taolo: “… ming oydan yaxshiroqdir” (Qadr surasi, 3-oyat) deb marhamat qilgan. 1000 oy – salkam 84 yilga, 84 yil – taxminan 30 295 kunga teng.

Qadr kechasi Ramazonning soʻnggi oʻn kunligida yashiringan, uni oʻsha kunlarning toq kunlaridan izlagan afzal deyiladi.

Paygʻambar Muhammad sollallohu alayhi vasallamning “Qadr kechasini Ramazonning ilk va eng soʻnggi hamda toq kechalaridan izlanglar!” degan soʻzlari keltirilgan Imom Abu Dovud rivoyati bor.

Oisha roziyallohu anho rivoyat qilgan hadisda esa Rasululloh sollallohu alayhi vasallam: “Qadr kechasini Ramazon oyining oxirgi oʻn kunligidan qidiringlar”, deganlar.

Laylatul qadr kechasi alomatlari
Ushbu muborak kechaning alomatlari quyidagi namoyon boʻlishi mumkin:

• qadr kechasida sokinlik hukm suradi. Atrof musaffo, yorugʻ, xuddi sukunatga oʻralgan yogʻduli oy charaqlab turgandek boʻladi;
  
• osmondagi yulduzlar uchmaydi, boshqa jismlar qaltis harakat qilmaydi. Kasalliklar paydo boʻlmaydi;
  
• havo moʻ'tadil boʻladi, juda issiq ham, juda sovuq ham boʻlmaydi;
  
• ertalab quyosh qizarib, togʻaraga oʻxshash, yogʻdusi juda zaif boʻlib ufqdan bosh koʻtaradi. Sababi oʻsha tun va kunda koʻp farishtalar erga tushib-chiqib turishi oqibatida quyosh nurlarini ham toʻsib qoʻyadi;
  
• qadr kechasida yomgʻir-qor yogʻmaydi, yogʻsa ham oʻta mayin va yoqimli boʻladi. Shoʻr suvlar chuchuk boʻladi;
  
• daraxtlar oʻz shoxlarini erga egiltirib turadi;
  
• oʻsha kuni shaytonlar chiqishiga yoʻl qoʻyilmaydi.

Bu kecha Alloh taoloning amri bilan farishtalar har bir osmondan va “Sidratul muntaho”dan (ya'ni, Jabroil alayhissalom maskanidan) erga tushadi, tong otguncha insonlar haqiga duo qiladi.

Laylatul qadr kechasi ado etiladigan amallar
Xufton va bomdod namozlarini jamoat bilan oʻqish tavsiya etiladi. Bu kechada qazo namozlar, nafl va tahajjud namozlarini oʻqigan afzal. Qolaversa, Qur'oni karim tilovati, Allohni ulugʻlab aytiladigan tasbeh, istigʻfor va zikrlar, paygʻambar Muhammad sallollohu alayhi vasallamga bagʻishlab salovat va durudlar aytish savobligi aytiladi.

Laylatul qadr kechasi oʻqiladigan duo
Oisha roziyallohu anho: “Yo Rasululloh agar Qadr kechasini topishga muvaffaq boʻlsam nima deb duo qilay?” deb soʻradilar.

Shunda Rasululloh sollallohu alayhi vasallam ushbu duoni oʻqishni aytdilar:
"Allohumma innaka a'fuvvun kariymun tuhibbul a'fva fa'fu a'nniy".
Ma'nosi: "Allohim, albatta, Sen kechirguvchisan, kechirishni yaxshi koʻrasan. Gunohlarimni kechirgin" (Imom Termiziy rivoyati).

Muhimi, bu kechani ibodat, zikr, tilovat va boshqa xayrli amallar bilan oʻtkazish lozim. “Zamin” yangiliklarini “Telegram”da kuzatib boring