O'zbekiston Respublikasi Pensiya jamg'armasi fuqarolarni, xususan, nafaqaxo'rlarni nishonga olgan yangi firibgarlik sxemasi tarqalayotgani haqida ogohlantirdi. Firibgarlar o'zlarini jamg'arma xodimlari sifatida tanishtirib, nafaqaxo'rlarga telefon orqali murojaat qilib, pensiya hisoblashda xatolik bo'lganini aytishadi va uni oshirish xizmatini taklif qilishadi.
Buning evaziga ular shaxsiy ma'lumotlarni, jumladan, bank kartalari rekvizitlari, PINFL va ba'zi hollarda pul mablag'larini talab qilishadi. Pensiya jamg'armasining rasmiy vakillari ta'kidlashicha, pensiyalarni qayta hisoblash faqat fuqarolar tomonidan shaxsan murojaat qilgan holda tuman yoki shahar bo'limlarida amalga oshiriladi.
Jamg'arma xodimlari hech qachon telefon orqali yoki ko'chada bunday xizmatlarni taklif qilmaydi. Fuqarolarga o'z shaxsiy ma'lumotlarini uchinchi shaxslarga bermaslik qat'iyan tavsiya etiladi.
Shubhali takliflarga duch kelinganda, zudlik bilan Pensiya jamg'armasining ishonch telefoni – 1271 yoki huquqni muhofaza qilish organlariga 102 raqami orqali murojaat qilish lozim.
