IIO talablariga bo‘ysunmaganlarga endilikda jazo keskin kuchaytiriladi!

Oliy Majlis Senatining navbatdagi yalpi yig‘ilishida O‘zbekiston Respublikasi Ma’muriy javobgarlik to‘g‘risidagi kodeksning bir qator moddalariga muhim o‘zgartishlar kiritish haqidagi qonun senatorlar tomonidan bir ovozdan ma’qullandi.

Qayd etilishicha, oxirgi bir necha yil ichida jamoat xavfsizligini ta’minlash, tinchlik va tartibni saqlash bilan shug‘ullanayotgan ichki ishlar organlari va Milliy gvardiya xodimlarining qonuniy talablarini bajarishni rad etish bilan bog‘liq holatlar keskin ko‘payib bormoqda. Bu esa huquq-tartibot idoralari tomonidan jiddiy xavotir uyg‘otgan va bu holatlarga qarshi kurashish uchun qat’iy choralar ko‘rilishini taqozo qilmoqda.

Mavjud statistika ham bu muammoning dolzarbligini yaqqol namoyon qilmoqda. Masalan, 2021 yilda ichki ishlar xodimlarining talablariga bo‘ysunmaslik holatlari 56 mingdan oshgan bo‘lsa, 2022 yilga kelib bu raqam keskin o‘sib, qariyb 89 ming holatga yetgan. Bu ko‘rsatkich 2023 yilda 88988 ta, 2024 yilda esa 85278 ta holatni tashkil etgani holatning jiddiyligini tasdiqlaydi.

Shu munosabat bilan, Ma’muriy javobgarlik to‘g‘risidagi kodeksga sezilarli o‘zgartishlar kiritishga qaror qilindi. Xususan, ichki ishlar organlari va Milliy gvardiya xodimlarining qonuniy talablarini bajarmagan shaxslarga belgilanadigan jazo miqdori ancha kuchaytiriladi.

Agar avval bunday holatlar uchun bazaviy hisoblash miqdorining faqat 1 baravarida jarima belgilangan bo‘lsa, endi bu qonunbuzarlik uchun jarima miqdori 5 baravardan 12 baravargacha oshiriladi. Bu orqali huquqbuzarlarning ma’muriy jazodan cho‘chimaslik holatlariga chek qo‘yilishi kutilmoqda.

Bundan tashqari, huquqbuzarlikni ma’muriy jazo qo‘llanilganidan keyingi bir yil ichida yana takror sodir etgan shaxslarga nisbatan ham jazo keskinlashtiriladi. Endilikda bunday hollarda jarima miqdori bazaviy hisoblash miqdorining 12 baravaridan 30 baravarigacha yetishi yoki huquqbuzar 15 sutkagacha ma’muriy qamoqqa olinishi mumkin bo‘ladi. Eslatib o‘tamiz, avval bu turdagi takroriy huquqbuzarliklar uchun 15 baravar miqdorida jarima nazarda tutilgan edi.

Mutaxassislarning fikricha, ushbu o‘zgarishlar jamoat tartibini saqlashda xizmat qilayotgan ichki ishlar va Milliy gvardiya xodimlariga nisbatan hurmat va qonun ustuvorligini ta’minlashga yordam beradi. Bunday qat’iy choralarning qo‘llanilishi mamlakatda huquqiy ongning oshishiga va tartib-intizomning yanada mustahkamlanishiga hissa qo‘shishi kutilmoqda.

Qonun Oliy Majlis Senati tomonidan ma’qullanib, endi imzolash uchun davlat rahbariga yuborilgan. Agar prezident ushbu qonunni tasdiqlasa, uning amaldagi kuchga kirishi yaqin vaqt ichida amalga oshadi. Bu esa ichki ishlar va Milliy gvardiya xodimlarining faoliyatiga nisbatan qonunga bo‘ysunmaslik holatlari keskin kamayishiga olib kelishi mumkin.

Eslatib o‘tamiz, qonunning asosiy maqsadi – jamoat xavfsizligini saqlash, fuqarolarning tinchligi va xavfsizligini ta’minlash hamda huquq-tartibot xodimlari tomonidan berilgan qonuniy talablarning so‘zsiz bajarilishini kafolatlashdir. “Zamin”ni Telegramʻda oʻqing!